بۇل شارا سىبايلاس جەمقورلىققا قارسى جانە كونكۋرستىق راسىمدەردى اشىق وتكىزۋگە باعىتتالعان.
1 ساۋىردەن باستاپ پەداگوگتەردى مەكتەپكە جۇمىسقا قابىلداۋ بويىنشا جاڭا مودۋل ىسكە قوسىلادى، دەپ حابارلايدى اlmaty-akshamy.kz وقۋ-اعارتۋ مينيسترلىگىنىڭ باسپا ءسوز قىزمەتىنە سىلتەمە جاساپ.
سيفرلىق قىزمەت ۇلتتىق ءبىلىم بەرۋ دەرەكتەر قورىنا ەنگىزىلدى. بۇل شارا سىبايلاس جەمقورلىققا قارسى جانە كونكۋرستىق راسىمدەردى اشىق وتكىزۋگە باعىتتالعان.
سونداي-اق پەداگوگتەردى اتتەستاتتاۋدا قۇجاتتاردى تاپسىرۋ بويىنشا دا اۆتوماتتاندىرۋ ەنگىزىلىپ جاتىر. ەندى پەداگوگتەردىڭ بارلىق مالىمەتى "پەداگوگ پورتفوليوسى" مودۋلىندە جيناقتالادى. مۇندا پەداگوگ تۋرالى، ونىڭ ءبىلىمى، دەنساۋلىق جاعدايى، جۇمىس تاجىريبەسى، قۇقىق بۇزۋشىلىقتار، اتتەستاتتاۋدان ءوتۋ، ماراپاتتارى جانە تالىمگەرلىك پەن سيفرلىق قۇجاتتار تۋرالى ەلەكتروندىق اقپارات ساقتالادى.
"اشىقتىق پەن ەسەپتىلىكتىڭ بولۋى سىبايلاس جەمقورلىققا قارسى كۇرەستە باستى ءرول اتقارادى. وسى مودۋلدەردى ەنگىزە وتىرىپ، پەداگوگتەردى جۇمىسقا قابىلداۋ كەزىندە قاعاز جۇزىندەگى قۇجات اينالىمىن جانە سىبايلاس جەمقورلىق تاۋەكەلدەرىن تولىق جويۋ جوسپارلانىپ وتىر. جۇيەنى ىسكە قوسۋ الدىندا باسقارما، بولىمدەر مەن ءبىلىم بەرۋ ۇيىمدارىنىڭ ماماندارى ءۇشىن وقىتۋ ۇيىمداستىرىلدى"، – دەدى وقۋ-اعارتۋ مينيسترلىگى سيفرلاندىرۋ دەپارتامەنتى ديرەكتورىنىڭ ورىنباسارى مايرا مارالبايەۆا.
بۇعان دەيىن اتالعان مودۋل شىمكەنت قالاسىندا جانە قاراعاندى وبلىسىنىڭ شاحتينسك قالاسىندا سىناقتان ءوتتى. سونداي-اق، جۇمىس ىزدەۋ جانە قاجەت پەرسونالدى تاڭداۋ بويىنشا ەلىمىزدىڭ باسقا وڭىرلەرىندە دە ۇلتتىق ءبىلىم بەرۋ دەرەكتەر قورىنىڭ "ەلەكتروندىق ەڭبەك بيرجاسى" پلاتفورماسىمەن ءوزارا ينتەگراسياسى جوسپارلانعان.