Ábilhan Qasteev atyndaǵy QR Memlekettik óner mýzeıinde «Men júregimmen kóremin» atty erekshe kórme ashyldy. Ereksheligi sonda, onda qoıylǵan sýretter zaǵıp jandardyń qolynan shyqqan.
«Bul joba kózi nashar kóretin jáne múldem kórmeıtin jandardyń ómirine ǵana nazar aýdarýǵa emes, sonymen birge bizdiń álemniń sulýlyǵyna erekshe tánti barlyq adamnyń máńgilik ónerge degen mahabbatyna arnalǵan», – deıdi biregeı kórmeni uıymdastyrǵan ıakýt sýretshisi Marıka Andreeva.
Biz, ıaǵnı kózi kóretin adamdar aqparattyń 80%-yn kórý arqyly qabyldaıdy ekenbiz. Al zaǵıp jandarda basqa sezimder men túısikter erekshe damyǵan. Qarańǵylyq olardy syrtqy álemnen aıyrǵanymen, ózderin shynaıy estýge múmkindik beredi desedi. Olardy alańdatatyn artyq eshteńe joq. Sondyqtan olar óziniń jan dúnıesine alańsyz saıahattaı alady deıdi zertteýshiler.
«Men júregimmen kóremin» áleýmettik jobasyna buryn ıakýttyq azamattar qatysyp júrgen bolatyn. Keshegi kórmede olardyń qataryna ózimizdiń Ardan Ǵalymuly da qosyldy. Onyń Qasteev mýzeıi tórinen oryn alǵan sýreti «Erkindik» (holst, maı) dep atalady eken. Shyǵarmashylyqqa jaqyn jigittiń kózi kórmese de, sportta da óz bıigin baǵyndyryp júr. Ol golbolmen (kózi nashar kóretin jáne múldem kórmeıtinderge arnalǵan, quramynda úsh oıynshy bolatyn sporttyq oıyn) aınalysady. Áleýmettik jelide jıi kórinip júrgen belsendi bloger. Kórmege onyń shashbaýyn kóterip kelinshegi Tomırıs te keldi. «Men – Ardannyń kózimin, al ol – meniń júregim» degen Tomırıstiń jaryn da, onyń árbir qadamyn da qurmetteıtini kórinip turdy.
Sondaı-aq, biregeı áleýmettik kórmede ıakýtıalyq zaǵıp jandar – Ilá Smertınniń «Tabıǵatyn», Valerıı Kornılovtyń «Avtoportretin», Innokentıı Kononovtyń «Shabyndyq» týyndysyn, Sahaıa Danılovanyń «Kúnniń batýy» shyǵarmasyn, Mıchıl Moıseevtiń «Armanyn» tamashaladyq.
Olar bul týyndylarynda ózderiniń álemge degen kózqarasyn, ony ishteı qalaı kóretinin jáne sezinetinin kórsete bilgen. Óner arqyly olar óz oıyn, armanyn jetkizýge tyrysqan. Árbir týyndy zaǵıp jandardyń ózine ǵana belgili basqa shyndyqta ómir súretin adamnyń ishki álemine tarta otyryp, kórermenniń tereń seziný túısigin týdyrady.
Joǵaryda aty atylǵan zaǵıp jandar týraly berer sóz aıta ketsek deımiz. Máselen, Sahaıa Danılova ómirge kóz aqaýymen týǵan eken. Ókinishke oraı, onyń dertiniń aldynda medısına dármensiz bolyp, kórý qabileti birtindep nasharlaı berip, qazirgi ýaqytta múldem kórmeı qalǵan. Taǵdyryna moıyǵan Sahaıa joq, tarıh fakúltetin bitirip, mamandyq ıgerip shyqty jáne jeńil atletıkamen, ústel tenısimen aınalysyp júr. Ol «Kúnniń batýy» dep ataǵan kartınasynda uıasyna qonyp bara jatqan kúnniń shapaǵyna tańdanyp turǵan otbasyn beınelepti. Sahaıa otbasyn qurýdy armandaıdy. Rýhty qyzdyń armanyna jetetinine senemiz.
Al 16 jasqa tolǵan sátinde «Tabıǵatty» beınelegen Ilá Smertınniń armany tipti erekshe jáne sizdi tebirentpeı qoımasy anyq. Ol jaryq dúnıege zaǵıp bolyp kelgen. Degenmen «armanyńyz qandaı?» degen saýalǵa «meni únemi qamqorlyqqa, jylylyqqa bólep júretin anashymnyń júzin birer sekýndqa bolsa da kórý» dep jaýap bergen. Ilányń «Tabıǵat» kartınasyna syldyrlap aǵyp jatqan ózen, jaǵasyndaǵy jasyl jelekti aǵashtar, sýǵa ábden shaıylǵan tap-taza tastar beınelengen.
«Avtoportret» ıesi Valerıı Kornılov ta qara jaıaý emes, sýret salýdan tys, «Egor oqýlarynda» óner kórsetedi. Al «Shabyndyq» ıesi Innokentıı Kononov kózi kórmese de óz qolymen úı turǵyzǵan jan.
Kórme aıasynda almatylyqtar ózgeshe formatta uıymdastyrylǵan konsertti de tamashalady. Konsert aldynda kórermenderge qara tústi kózge tańatyn tańǵyshtar taratylyp, olar mýzykany kózderi baılanǵan kúıi tyńdady. Tańǵajaıyp bul eksperıment kópshilikke unaǵan sekildi. Sóıtip uıymdastyrýshylar zaǵıp sýretshilerdiń kartınalarymen qatar, dybystyń, mýzykanyń, ıistiń jáne basqa da ımmersıvti komponentterdiń kómegimen ónerge tolyqtaı ený múmkindigin jasaýǵa umtylǵandaı. Iá, jınalǵan jurt mýzykalyq aspaptan tógilgen áýenderdiń qarańǵylyqta múldem basqasha estiletinin, erekshe qabyldanatynyn aıtyp jatty.
Al biz óz kezegimizde erekshe jandardyń ózderiniń álemine úńilýge múmkindik bergeni úshin, júrekteriniń ashyqtyǵy men tazalyǵy úshin alǵys aıtamyz.