Qazaqstannyń ár oblysyndaǵy úzdik aýyldar týraly kitap jaryq kórdi
«Úzdik 30 aýyl» anyqtamalyq álbomy ıdeıasynyń avtory Murathan Shoqan jaz boıy elimizdiń barlyq oblysynan materıal jınap, jınaqty jaryqqa shyǵarǵan. Qazaqstan Jazýshylar odaǵynyń múshesi «Ár aýyldan shyqqan azamattar óńirdiń damýyna úles qosyp otyr» deıdi. Atalǵan kitapqa eldiń barlyq oblysynan 2-3 úzdik aýyl engen. Jalpy, Táýelsizdigimizdiń 30 jyldyǵyna oraı tek 30 aýyl ǵana iriktelip alynǵan, dep habarlaıdy Almaty-akshamy.kz
«Birinshi maqsat - jetistikti kórsetý bolsa, ekinshi maqsat - sol aýyldardy kórkeıtýge ólsheýsiz úles qosyp otyrǵan kásipker azamattardy kórsetý. Men bir aı boıy aýyldardy aralaǵan kezde kórdim. Týǵan jerge týyn tigip, aýylyna bar aqshasyn, qarajatyn salyp, sol aýyldyń qazanyn qaınatyp otyrǵan myqty azamattar bar», – deıdi Qazaqstan Jazýshylar odaǵynyń múshesi Murathan Shoqan.
Anyqtamalyq álbomda aýyldyń tarıhy men ondaǵy áleýmettik nysandar qamtylǵan. Al aýyldan shyqqan tulǵalar degen bólimde eldi mekendi kórkeıtip otyrǵan jandar tanystyrylǵan. Parlament Senatynyń depýtaty Nurtóre Júsip keleshekte bul jobanyń aýqymyn keńetý kerek deıdi. Tek 30 aýyl ǵana emes, 300 aýylǵa jetse, nur ústine nur bolady degen tilegi bar.
«Qazaqstan áleýeti, Qazaqstannyń munaıy, Qazaqstannyń astyǵy, Qazaqstannyń altyny, kúmisi dep jatamyz. Sol sıaqty Qazaqstan aýyldary da úzdik bolýy kerek. Kemshiligi joq aýyl bolmaıdy, álbette. Degenmen, keı aýylda barlyq tıisti jaǵdaılar jasalǵan, baseınge deıin bar. Máselen, Qyzylorda oblysyndaǵy aýylda aýdan ortalyǵyna bergisiz keremet saýda úıi, jastar aleıasy bar», – dedi, QR Parlamenti Senatynyń depýtaty Nurtóre Júsip.
Saltanatty jıynǵa qatysqandar aýyldardyń jaǵdaıyn elep, onyń ǵajaıyptarynyń qala ómirinen kem túspeıtinin dáripteýde mundaı jobalardyń yqpaly zor ekenin aıtyp tarqasty.