Tergeý barysynda qaskóılerdiń 10 kólik quralyn urlanǵandary belgili boldy.
Almatyda urlanǵan kólik quraldaryn bólshektep satýmen aınalysqan top quryqtaldy, dep habarlaıdy Almaty-akshamy.kz Polisia.kz saıtyna silteme jasap.
Qalalyq krımınaldy polısıa qyzmetkerleri atalǵan qylmysqa qatysty buryn buzaqylyq jasaǵany úshin sottalǵan Jambyl oblysynyń 26 jastaǵy turǵynyn jáne osyǵan deıin eki ret sotty bolǵan 25 jastaǵy er adamdy ustady.
«Olardy quryqtamas buryn, bizdiń basqarma qyzmetkerleri kúdiktilerdiń árqaısysynyń atqaratyn qylmystyq áreketterin arnaıy operasıa barysynda zerdelep, urlanǵan kólik quraldaryn bólshektep satýǵa jaýapty adamdy da anyqtady. Atalǵan qylmystyq top alty adamnan quralǵan. Olardyń úlkenderiniń jasy 47-de bolsa, eń jas kúdikti 25-te bolyp shyqty. Bulardyń barlyǵy ońaı jolmen paıda tabýdy kózdegen. Dálirek aıtqanda, eki kúdikti ózderin qala bazarlarynyń birinde qosalqy bólshekter satýmen aınalysatyn jeke kásipker retinde tanystyrǵan. Alaıda olardyń saýda núktelerinde tek qana urlanǵan kólik quraldarynyń qosalqy bólshekteri ǵana saýdalanǵan», – dep málimdedi Almaty qalasy PD-niń krımınaldyq polısıa basqarmasynyń bastyǵy Qýatbek Naýatov.
Olar kóbinese eski úlgidegi BMW, Lada, Nissan, Audi, Volkswagen kólikterin urlaǵan eken.
«Qazirgi tańda úsh avtokólik tolyǵymen anyqtalsa, qalǵan jeti kóliktiń qaıda jasyrylǵany anyqtalýda. Kúdiktilerdiń aıtýy boıynsha, olar ol kólikterdi kórshiles oblystarǵa aparyp úlgergen. Kúdiktiler qamaýǵa alyndy. Tergeý amaldary jalǵasýda», – dep atap ótti Naýatov.