Almaty ákimi Baqytjan Saǵyntaev jańa jelilik parktiń salynýyna qatysty. İs-shara Qazaqstan Táýelsizdiginiń 30 jyldyǵyna oraılastyrylǵan, dep habarlaıdy Almaty-akshamy.kz
Baqytjan Saǵyntaev is-sharaǵa qatysýshylardy, jobaǵa qoldaý kórsetken mesenattardy, sondaı-aq barsha qala turǵyndaryn kele jatqan basty merekemen quttyqtady.
«Jaıly jaǵdaı jasaý, Almaty ekologıasyn jaqsartý jónindegi keshendi sharalar bizdiń basty mindetterimiz bolyp tabylady. Jańa saıabaq Jasyl Almaty jobasy aıasynda qurylatyn qalanyń jasyl beldeýiniń mańyzdy bóligine aınalady», - dedi Baqytjan Saǵyntaev.
Jańa parktiń qurylýyna bıznestiń áleýmettik jaýapkershiligi aıasynda iri qurylys kompanıalary qoldaý kórsetti. Jelili parktiń alańy – 107,1 ga. Ol Alataý aýdanynda, B. Momyshuly kóshesiniń batysynda ornalasqan.
Birinshi kezeńde 3,2 ga alańda kógaldandyrý aıasynda 600-den kem emes japyraqty aǵash kóshetteri, onyń ishinde shegirshin, shaǵan jáne qara órik otyrǵyzylady.
Eske salsaq, Almatyda ekinshi jyl Jasyl Almaty baǵdarlamasy júzege asyrylýda, onyń aıasynda úsh jylda 1 mln aǵash otyrǵyzý qarastyrylǵan. Búginde qalanyń barlyq aýdandarynda 530 myńnan astam aǵash otyrǵyzyldy.
Bıyl 350 myń aǵashty otyrǵyzý bastaldy, qazirgi kezde otyrǵyzylǵany – 115 myńǵa jýyq aǵash.
