«Aqmeshit» gýmanıtarlyq-tehnıkalyq ınstıtýty bas lısenzıasynan aıyryldy.
QR BǴM Bilim jáne ǵylym salasynda sapany qamtamasyz etý komıteti júrgizgen qaıta tekserýdiń nátıjeleri osyndaı boldy, dep habarlaıdy Almaty-akshamy.kz mınıstrliktiń baspasóz qyzmetine silteme jasap.
Qyzylorda qalasyndaǵy «Aqmeshit» ınstıtýtyna uıǵarym berilip, oqý ornyna barlyq sáıkessizdikti joıýǵa ýaqyt berildi. Alaıda, joǵary oqý orny berilgen ýaqytty bilim berý qyzmetteriniń sapasyn jaqsartý úshin qajetti jumysty júrgizýge emes, sot talqylaýyna jáne QR BǴM komıtetiniń is-áreketterine shaǵymdanýǵa jumsady.
«Joǵary oqý oryndarynda tekserý jumystaryn bilim berý sapasy men kadrlar daıarlaýdy jaqsartý úshin júrgizetinimizdi túsiný mańyzdy. Bul rette biz joo-lardy lısenzıadan birden aıyrmaımyz jáne olardy birden jappaımyz. Joǵary oqý oryndaryna buzýshylyqtardy joıýǵa ýaqyt berilgenimen, eshqandaı áreket bolǵan joq. Osyǵan baılanysty biz keıinirek qatań sharalar qabyldaýǵa májbúrmiz. Joǵary oqý oryndarynyń stýdentteri úshin jaǵdaı jasap, bilim berý baǵdarlamalarynyń sapasyn jaqsartýǵa qol jetkizýi mańyzdy. Áıtpese, josyqsyz ýnıversıtetter sapaly bilimmen qamtamasyz etpeı, dıplom berýdi jalǵastyratyn bolady. «Aqmeshit» gýmanıtarlyq-tehnıkalyq ınstıtýtyna keletin bolsaq, sońǵy tekserý osy jyldyń maýsym aıynda júrgizildi. Buzýshylyqtar joıylǵan joq. Áńgime materıaldyq-tehnıkalyq bazanyń álsizdigi jáne oqý prosesin uıymdastyrýdaǵy eleýli kemshilikter týraly bolyp otyr. Ýnıversıtettegi keıbir pánderdi tıisti bilimi men dárejesi joq oqytýshylar júrgizgen. Tipti oqý prosesin merziminen buryn aıaqtap, nátıjesinde stýdentter bilim berý baǵdarlamalaryn tolyq ıgere almaǵan. Qazirgi tańda ınstıtýt oqý ornyn lısenzıadan aıyrý týraly qabyldaǵan sheshimimizge narazylyq bildirýge tyrysyp jatyr», – dedi QR BǴM Bilim jáne ǵylym salasynda sapany qamtamasyz etý komıtetiniń tóraıymy Gúlzat Kóbenova.
Osy jyldyń túlekteri basqa joǵary oqý oryndaryna aýysa alady jáne olardyń oqý nátıjeleri eskerilip, dıplom beriledi.