Qazaq biliminiń qarashańyraǵy Ál-Farabı atyndaǵy Qazaq ulttyq ýnıversıtetinde bıylǵy birinshi kýrstyqtardy «Stýdentter qataryna qabyldaý» saltanatty keshi ótti. Ál-Farabı eskertkishi aldyndaǵy Jastar alańynda ótken sharaǵa Almaty qalasynyń ákimi Erbolat Dosaev bastaǵan belgili tulǵalar, ǵalymdar men jazýshylar, ýnıversıtet oqytýshylary men stýdentteri qatysty. Dástúrli mereke 1-kýrs stýdentteriniń sherýimen bastaldy.
Bıyl Memleket basshysy Qasym-Jomart Toqaev alǵash ret ýnıversıtetke arnaıy kelip, ýnıversıtetti damytý jóninde birqatar tapsyrmalar berdi.
Jaqynda Úkimet qaýlysymen QazUÝ-ǵa zertteý ýnıversıteti mártebesi berilip, Memleket basshysynyń qoldaýymen Túrkıanyń Ystambul qalasynda jáne Qyrǵyz Respýblıkasynyń astanasy Bishkekte QazUÝ fılıaldary ashyldy. Sonymen qatar, bıylǵy jyly QazUÝ-da QR Ǵylym jáne joǵary bilim mınıstri Saıasat Nurbektiń qatysýymen Reseıdiń MIFI Ulttyq ıadrolyq zertteý ýnıversıtetiniń fılıaly ashylyp otyr. Qazirgi tańda ýnıversıtette 25 myńǵa jýyq stýdent oqysa, olardyń 2,5 myńǵa jýyǵy álemniń 50 elinen kelgen sheteldik stýdentter. Merekeli kesh barysynda ýnıversıtet basshysy J.Túımebaev:
– Ýnıversıtettegi fakúltetter, kafedralar, ǵylymı-zertteý ınstıtýttary, ınovasıalyq zerthanalar men ǵylymı ortalyqtardyń barlyǵy sizderdiń tolyqqandy bilim alýlaryńyzǵa qyzmet etedi. Ótken jyldan beri jataqhanalar men oqý korpýstary kúrdeli jóndeýden ótse, bul jumystar bıyl da jalǵasýda. Eń bastysy, aldaǵy ýaqytta jańa jataqhana salý josparda bar. Osy ıgilikterdi durys paıdalanyńyzdar. Ǵylymdy ıgerip, bilikti maman bolyńyzdar, – dep, jastardy ýaqytty tıimdi paıdalanýǵa shaqyrdy.
Sonymen qatar, Bilim kiltin tabystaý rásimi de jańa tehnologıalardy paıdalana otyryp júzege asty. 1-kýrs stýdentteri sahnadan derbes QR-kodyn skanerlep, erekshe sátke belsene atsalysty. «Ulytaý» etno-rok toby, ánshi Gúlnur Orazymbetova, tanymal jastar oryndaýshysy MALIKA YES, «Melomen» tobymen qatar, talantty, kreatıvti jastar da óz ónerlerin kórsetti. Bul kúni hımıa jáne hımıalyq tehnologıalar, bıologıa jáne bıotehnologıalar fakúltetteriniń stýdentteri ýnıversıtet ǵalymdarynyń ǵylymı jańalyqtarynyń tusaýkeserin ótkizdi. Búgingi tańda QazUÝ álemdik reıtıńtegi kóshbasshy oqý oryndarynyń qataryna enip, álemdik reıtıńte 150-orynǵa kóterildi.