Memlekettik qýyrshaq teatrynyń ujymy jaqynda Sankt-Peterbýrg qalasyndaǵy «KÝKART» Halyqaralyq qýyrshaq teatrlary festıvaline qatysady.
Qýyrshaq teatrlarynyń qara shańyraǵy, Almaty qalasynyń mádenı-tarıhı qundylyqtarynyń biri bolǵan atalmysh teatr shyǵarmashylyǵy qarqyndy damý ústinde. Dittep otyrǵan festıváldiń shymyldyǵy 22 maýsym kúni túrilse, Almaty mádenıet basqarmasyna qarasty Memlekettik qýyrshaq teatry «Romeo men Djýletta» (rej.: D.Jumabaeva) spektaklimen 27 maýsym kúni Zazerkale teatrynyń sahnasynda óner kórsetedi.
Kórermender men sarapshylar nazaryna túrli baǵyttaǵy qoıylymdar usynatyn óner dodasy – 1993 jyldan beri ótkizilip kele jatqan qaıyrymdylyq baǵyttaǵy komersıalyq emes jalǵyz festıvál. Túrli elder men halyqtar arasyndaǵy mádenı kópirge aınalǵan bıylǵy festıválde Qytaı, Germanıa, Serbıa Estonıa, Tyva, Qazaqstan jáne Sankt-Peterbýrg, Máskeý qalalarynyń óner oshaqtary óz qoıylymdaryn usynady. Festıvál aıasynda teatrlyq jobalar, arnaıy spektáklder sahnalady. Álem klasıkasynyń ozyq úlgisi «Romeo men Djýletta» (rej.: D.Jumabaeva) spektakli negizgi baǵdarlamaǵa enip otyr.
«Romeo men Djýletta» teatr repertýaryna 2019 jyldyń 24 qańtarynda qosylǵan eresekterge arnalǵan spektáklderiń biri. 18 jastan joǵary kórermenderge arnalǵan spektákl sulýlyq pen tazalyqqa tabynýdan, albyrttyǵy jarasqan eki ǵashyqtyń taǵdyry arqyly áýlet pen tobyrdyń bitpes daýyn ashýdan týyndaǵan. Jaryqqa shyqqaly birneshe Halyqaralyq teatr festıvalinde baq synaǵan spektákl qýyrshaq teatrynyń jańa baǵyttaǵy batyl tájirıbesin kórsetip keledi.
Qýyrshaq teatry buǵan deıin 2019 jyly ótken atalmysh festıválge E.Ionovtyń «Ana júregi» qoıylymymen qatysyp, «Úzdik akterlik ansámbl» nomınasıasyn qanjyǵaǵa baılaǵan bolatyn.