Olarǵa aqshalaı nemese zattaı mánde birjolǵy áleýmettik kómek berildi.
Bes myń eki júz qazaqstandyq Semeı ıadrolyq synaq polıgonynyń jabylý kúnine oraı memleketten kómek aldy, dep habarlaıdy Almaty-akshamy.kz.
«Bul kómekti Uly Otan soǵysynyń ardagerlerine teńestirilgen azamattar ala alady. Olarǵa ıadrolyq synaqtarǵa tikeleı qatysqan áskerı qyzmetshiler, sondaı-aq ıadrolyq qarýdy synaý saldarynan múgedek bolǵan adamdar jáne ata-anasynyń biriniń radıasıalyq sáýle alýy sebebinen genetıkalyq jaǵynan múgedek bolyp qalǵan olardyń balalary jatady»,– delingen Eńbek jáne halyqty áleýmettik qorǵaý mınıstrliginiń baspasóz qyzmetiniń habarlamasynda.
Mamandardyń habarlaýynsha, áleýmettik kómektiń mólsheri árbir óńirde jergilikti ókildi organdardyń (máslıhattardyń) sheshimi boıynsha búdjettiń múmkindikterine qaraı jeke-jeke belgilenedi.
– ıadrolyq synaqtar men oqý-jattyǵýlarǵa tikeleı qatysqan adamdarǵa – 6,19 aılyq eseptik kórsetkish (18 057 teńge) ;
– eger aýrýdyń, múgedektiktiń ıadrolyq qarýdy synaýmen sebepti-saldarlyq baılanysy bolsa – 7,55 aılyq eseptik kórsetkish (22 024 teńge).
Tótenshe ekologıalyq jaǵdaılar saldarynan, onyń ishinde ıadrolyq jarylystar men synaqtar júrgizý kezindegi radıasıalyq áserden, olardyń saldarynan alǵan múgedektigi bar adamdarǵa sebep-saldarlyq baılanysy anyqtalǵan jaǵdaıda múgedektigi boıynsha memlekettik áleýmettik járdemaqy taǵaıyndalady:
– I top – 2,81 eń tómengi kúnkóris deńgeıi nemese 91 797 teńge;
– II top – 2,40 eń tómengi kúnkóris deńgeıi nemese 78 403 teńge;
– III top – 2,01 eń tómengi kúnkóris deńgeıi nemese 65 663 teńge.
Burynǵy Semeı oblysynyń aýmaǵynda jáne Pavlodar, Shyǵys Qazaqstan jáne Qaraǵandy oblystarynyń polıgonǵa irgeles aýdandarynda turatyn jáne turǵan azamattar úshin ıadrolyq synaqtardan keltirilgen zalal úshin birjolǵy aqshalaı ótemaqy kózdelgen.
Ótemaqy mólsheri turatyn aımaǵyna, kezeńine jáne ótemaqy berilgen kúni qoldanylatyn aılyq eseptik kórsetkishtiń shamasyna qaraı jeke aıqyndalady.
1996 jyldan 2020 jylǵa deıin atalǵan ótemaqyny 16,4 mlrd teńge somasynda 1,1 mln-nan astam adam aldy.
Sondaı-aq radıasıalyq qater aýmaqtarynda turatyn qazaqstandyqtardyń radıasıalyq áserden zardap shekken adam mártebesi bolǵan kezde qosymsha eńbekaqy jáne jyl saıynǵy aqy tólenetin qosymsha demalys alýǵa quqyǵy bar.
Budan basqa, tótenshe jáne eń joǵary radıasıalyq qater aımaqtarynda 1949 jylǵy 29 tamyz ben 1963 jylǵy 5 shilde aralyǵyndaǵy kezeńde keminde 5 jyl turǵan adamdardyń jasyna baılanysty zeınetaqy tólemderin jeńildikpen taǵaıyndaýǵa quqyǵy bar (erler – 50 jas, áıelder – 45 jas).