Búgin elordadaǵy Ulttyq mýzeıde Qazaqstanda tabylǵan 8-shi «Altyn adamnyń» jańǵyrtylǵan túriniń (rekonstrýksıa) tanystyrylymy ótti.
Elimizde segizinshi «Altyn adam» 2019 jyly Aqtóbe oblysy, Temir aýdany, Tasqopa eldi mekeninen tabylǵan, dep habarlaıdy Almaty-akshamy.kz QazAqparat saıtyna silteme jasap.
Sarmat dáýirine jatatyn qundy jádigerdi mamandar 2 jyl boıy zerttep, qaıta jańǵyrtyp, búgin elorda tórine alyp keldi.
«Altyn adam» — bizdiń tarıhymyzdyń asyl qazynasy. Ótkenimizdiń qandaı bolǵanyn osydan bilýge bolady. Bul — baǵa jetpes ulttyq qundylyq. Mine, Táýelsizdiktiń 30 jyldyǵy qarsańynda osyndaı aıtýly oqıǵaǵa kýá bolyp otyrmyz. Bir ǵana «Altyn adam» arqyly Uly Dalanyń ereksheligin tanyp, bilýge bolady. Elbasy Nursultan Nazarbaevtyń bastamasymen qolǵa alynǵan «Rýhanı jańǵyrý» baǵdarlamasynyń jemisi. Aqtóbe óńirinen tabylǵan kezekti «Altyn adam» bul jaı ǵana dúnıe emes jáne kezdeısoqtyqqa jatpaıdy. Bul týǵan jer tarıhynyń jańa paraqshasy, ata-babalarymyzdyń izi. Osy oraıda qundy jádigerdi taýyp, ony jańǵyrtýǵa atsalysqan arheolog, restavratorǵa alǵys bildiremin», - dedi QR Ulttyq mýzeıiniń dırektory Arystanbek Muhamedıuly segizinshi altyn adamnyń ashylý saltanatynda.
Segizinshi «Altyn adamnyń» sulbasyn qaıta jańǵyrtýǵa otandyq arheolog, restavratormen birge kórshi reseılik mamandar da úlesin qosqan.
«Altyn adam» 2019 jyldyń qazan aıynda tabyldy. Al Aqtóbede jurtshylyqqa byltyr kóktemde usynyldy. Sodan beri onyń sulbasyn qaıta jańǵyrtý jumysymen aınalystyq. Tabylǵan jádigerdiń qundylyǵyn saqtap, qasıetin joǵaltpaý úshin túpnusqadan alshaqtamaýǵa tyrystyq. Bul er adam, onyń múrdesinen bólek, jeke zattary da tabyldy. Onyń ishinde belbeý, qylyshtyń shirigen qaldyǵy jáne taǵy basqa zattar bar», - dedi Á.Marǵulan atyndaǵy Arheologıa ınstıtýtynyń qyzmetkeri, arheolog-ǵalym Arman Beısembaev.
Tarıhı jádiger Ulttyq mýzeıdiń «Altyn zalyna» qoıyldy. Onyń ashylý saltanatyna qoǵam qaıratkerleri men tarıhshy, arheolog-ǵalymdar qatysty.
«Altyn adamnyń» sulbasyn qaıta jańǵyrtýǵa (rekonstrýksıa) 2 jyldaı ýaqyt jumsaldy. Aldymen túpnusqa zertteledi. Iaǵnı shyǵarmashylyq emes zertteý jumystary júrgiziledi. "Tabylǵan altyn adamnyń jynysy qandaı? Jasy neshede? Ómirde kim bolǵan?" taǵy sol sıaqty saýaldarǵa jaýap izdeıdi. Odan bólek, tabylǵan zattar da zertteledi. Zertteý nátıjesi kórsetkendeı, segizinshi «Altyn adamnyń» jasy shamamen 50-de jáne ol kósem bolǵan», - dedi sýretshi-restavrator Bolat Atyraýbaev.