Aqmola oblysynda erte temir dáýiri kezeńindegi saq jaýyngeri jerlengen qorym, áshekeı buıymdar men qarý-jaraqtar tabyldy, dep habarlaıdy Almaty-akshamy.kz Inform.kz-ke silteme jasap.
«Oblystyq Tarıhı-mádenı murany qorǵaý jáne paıdalaný ortalyǵynyń mamandary Býrabaı aýdanyndaǵy Qumdykól (Zlatopole) aýylynyń aýmaǵynda «RegıonDorStroı» JSHS-ǵa bólingen jer ýchaskelerine zertteý jumystaryn júrgizý barysynda erte temir dáýiri men ortaǵasyrlyq kezeńderge jatatyn «Qumdykól» (Zlatopole aýyly) jáne «Jańajol» arheologıalyq eskertkishterin tapty.
Sonymen qatar barlaý jumystary barysynda aýyl turǵyndary Jańajol aýyly mańyndaǵy orman ishinde ornalasqan qorǵannyń ornyn kórsetti. Qorǵandy zertteý barysynda sýyrdyń ininen kóne jebeniń ushtary tabyldy», - dedi vedomstvodan.
Mádenıet basqarmasynan atap ótkendeı, osyndaı kóne arheologıalyq qorǵandar anyqtalǵan kezde Tarıhı-mádenı murany qorǵaý jáne paıdalaný ortalyǵynyń jarǵysyna sáıkes arheologıalyq qorǵaý-qutqarý jumystary júrgiziledi. Sebebi jer astyndaǵy ózge de qundy jádigerler tabıǵı jáne antropogendik faktorlardyń áserinen joıylyp ketýi yqtımal. Sondyqtan «Jańajol» qorǵanyna arheologıalyq zertteý júrgizildi.
«Zertteý barysynda qorǵannyń jerleý shuńqyrynan erte temir dáýirine qatysty – saq jaýyngeri anyqtaldy. Adammen birge jerlengen birneshe jádiger tabyldy, olardyń ishinde: jylqy malynyń aýyzdyǵy men júgenniń áshekeı buıymdary (qustyń basy men kún qudaıynyń belgisi bar dóńgelek japsyrmalar), qanjar-pyshaq, tasqaıraq, 10 dana saq-skıftik úlgidegi jebeniń ushtary jáne qysqa akınak-qylysh tabyldy», - dep tolyqtyrdy basqarmadan.
Tabylǵan jádigerler zerttelip bolǵan soń Aqmola oblystyq tarıhı-ólketaný mýzeıiniń ekspozısıalarynan oryn taýyp, mýzeı qoryn tolyqtyratyn bolady.