Nemese berekeni kókten emes, etken eńbekten tile.
Árkim óz úıin, aýlasyn taza ustaıdy. Otbasynan uzap syrtqa, kóshege, dúkenge, mektepke, jumysqa shyqqanda da, aınalamyz tap-taza bolyp jatady. Al sonda osynshama úlken Almatyny kimder tazalaıdy? Búgin sol týraly aıtamyz.
Shaharda «Almaty tazalyq» dep atalatyn irgeli mekeme bar. Onyń da ala tańnan bastalatyn qaınaǵan ómiri, óz tynys-tirshiligi bar. Kásiporynǵa 727 tehnıka tıesili. 1728 jumysker eńbek etip júr. Olar jyldyń tórt mezgilinde de árdaıym sapta turady. Iaǵnı Almatynyń biraz bóliginiń tazalyǵyna osy qala ákimdiginiń sharýashylyq júrgizý quqyǵyndaǵy «Almaty tazalyq» memlekettik komýnaldyq kásiporny jaýapty.
Ondaǵy eńbekkerler kóbimizge qaraǵanda jyly tóseginen tym erte, tań atpastan turady. Uıyqtap jatqan balalarynyń, nemereleriniń betinen súıip, tań qarańǵylyǵynda jumysty betke alady. Olar, ásirese, qalyń qar jaýǵan kúni, biz áli de shyrt uıqyda jatqan sátte, júzderin aıaz qaryp, qar kúrep, aınalany arshyp júredi. Iá, olar barshamyzdyń saıabaq, skverlerde taza aýa jutyp, taza jerdi basyp, taza trotýarmen júrip, avtobýsqa taza aıaldamadan otyryp, kúnimizdiń jaqsy bastalýy úshin de eńbek etedi.
Olar aýyr tehnıkalardy tizgindeıdi, konteınerlerdi kóteredi, súıreıdi. Qoldarynan kúrek, sypyrtqy túspeıdi. Mundaı jumystarǵa qarýly qoldar jáne tózimdi hám sabyrly adamdar ǵana shydaıdy. Al aralarynda áıel-analar da az emes. Olar – naǵyz eńbek adamdary!
Qys kezinde qalyń jaýǵan qardy kúreý, jaıaý júrginshiler jolyn tazalaý, muz oıý, taıǵaq jerge tuz, qum sebý, al kúzde tógilip túsetin saryala japyraqtardy álsin-álisn sypyryp alý, jaz mezgilinde, shilińgir shildede kúnge qaqtala júrip aryqtardy, aıaldamalardy tazalaý – úlken jumys. Onyń qanshalyqty aýyrlyǵyn kóshe tazalyǵyna jaýapty eńbek adamdary óte jaqsy biledi.
– Bizdiń «Almaty tazalyq» mekemesinde tek jaýapty, óz isine qurmetpeıtin qaraıtyn jandar jumys isteıdi dep bilemin. Olar jyldyń tórt mezgilinde de, «daýyldarǵa da, jaýyndarǵa» qaramastan, únemi at ústinde júredi. Bizdiń ár kúnimiz josparlanǵan. Sondyqtan jumystyń bári óz júıesin tapqan, – deıdi «Almaty tazalyq» memlekettik komýnaldyq kásipornynyń dırektory Ádilet Toqtasynov.
Dına MUNARBAEVA: Jumystan keıin nemerelerime asyǵamyn
Saǵat tańǵy 5-te turamyn. Sebebi, qalaǵa sonaý Shamalǵan beketinen kólikter keptelisine qalyp qoımaı, erterek jetýim kerek. Sosyn bárimizdi jumys ornymyzǵa arnaıy kólikpen ákelip salady. Bizge bólingen ýchaske - ál-Farabı dańǵylynan joǵary qaraı «Taýly qyrat» yqshamaýdanyna deıingi aralyq. Kúnde ádemi taýlardyń eteginde, taza aýada júremiz.
Kóshe tazalyǵyn saqtaý – biz úshin úlken jaýapkershilik. Jyldyń tórt mezgiliniń óz qıyndyǵy bar. Jumystyń ońaıy joq desek te, shyn kóńilińmen istegen kez kelgen isten bereke tabýǵa bolady dep oılaımyn. Osy jumysta júrgenime tórt-bes jyldyń júzi bolypty, úırenip te qaldym. Bul, bir jaǵynan, bizge deneni shynyqtyrý rólin atqarady, únemi qımyl-qozǵalys ústinde júremiz. Densaýlyqqa paıdaly. Tońsaq, shaıymyzdy iship, boı jylytyp alamyz. Úzilis arasynda bir-birimizben shúıirkelese áńgimelesip, arasynda ázil-qaljyńǵa da erik beremiz.
Iá, keıde kóz aldymyzda qazir ǵana sypyryp, tazalaǵan jerińe bireý temekiden bosaǵan qorabyn laqtyryp kete barǵanda, qynjylyp qalatynymyz bar. Keıde «kóz aldyńyzda turǵan qoqys jáshigine salsańyz qaıter edi» dep eskertemiz. İstegen isine uıalyp, keshirim suraıtyndar da joq emes.
Al keshke otbasyńa qaljyrap oralǵanda, aldyńnan nemereleriń tompańdap júgirip shyqqanda, kúni boıǵy sharshaǵanyń umytylyp ketedi.
Raısa KIİKBAEVA: Adal eńbektiń nany tátti
Biz Qazybek bı kóshesinen Raıymbek dańǵylyna deıingi aralyqty tazalaımyz. Almaty irgesindegi Eńbekshiqazaq aýdanynan kelip istep júrmin. Sondyqtan úlgerý úshin saǵat tańǵy 5-te turamyn. Saǵat 8-de jumysqa kirisip ketemiz. Tapsyrylǵan jumysymyzdy tyńǵylyqty atqaramyz. 11 jyl bolypty kóshe tazalaýshy bolyp júrgenime. Ras, alǵashqy kezde qysylatynmyn, «tanystar kezdesip qalmasa eken» dep, betimdi betperdemen, oramalmen búrkep alatynmyn. Keıin «jasyrynatyndaı men urlyq jasap júrmin be, bireýdi aldap júrmin de, nanymdy adal taýyp, otbasymdy aq adal eńbegimmen asyrap júrgen janmyn ǵoı» dep oıladym. Tipti, alǵashqy kezderi balalarymdy jumys ornyma ertip keletinmin, analarynyń qaıda istep júrgenin kórsin, eńbektiń, tazalyqtyń qadirin bilsin dep. Olarǵa jumystyń úlken-kishisi bolmaıtynyn, qandaı jumys isteseń de qolǵa juqpaıtynyn, tek adal eńbektiń ǵana nany tátti bolatynyn túsindirgim keldi. Shúkir, balalarym jaqsy bolyp ósti.
Otaǵasym - gıdrotehnık. Osy qarapaıym jumysym bar, kúıeýimniń tabysy bar degendeı, sóıtip, qyzymyzdy uzatyp, uldy úılendirdik. Jalaqymyz eshqashan keshiktirilmeıdi. Bastysy sol ǵoı. Eki brıgada isteımiz. Erler jaǵy túnde, tehnıkamen kelip istep ketedi. Biz áıelder erteńine kúndiz qolmen atqarylatyn jumystardy tyndyramyz.
Asqar JUMANIAZOV: Ózimdiki, ózgeniki dep bólmeımin
Shynymdy aıtsam, osy jumysqa kelgenimde, basymda bank nesıesi bolǵan. Memlekettiń osylaı bizge jasap otyrǵan múmkindigin, bizdi qoǵamdyq jumystarǵa tartyp, «eki qolǵa bir kúrek» taýyp berip otyrǵanyn atap ótkim keledi. «Jaman, jaman» deı berseń, bireý jaqsysyn ákelip bere me, masyldyq pıǵyldan arylý kerek. İsteımin degen adamǵa jumys tabylady, tek nıet kerek. Qazir nesıemnen qutyldym. Osy kóshe tazalap júrip-aq ótedim. Endi aldaǵy jyly ulymdy úılendirsem deımin.
Shyny kerek, qoǵam bolǵasyn, túrli adam bar degendeı. Keıde kóshede bizge, kóshe sypyrýshylarǵa shekesinen qarap ótetinder bar. Alǵashynda qabyldaı almaı, qınalyńqyrap qalatynmyn. Al qazir úırendim, sebebi ondaı kózqaras sol «men bıikpin» degen adamnyń shyn máninde tómendigin kórsetip turǵanyn túısindim. Eńbegiń adal ma, odan esh uıalmaý kerek. Ózim de úıdiń, aýlamnyń, aınalamnyń jınaqy, taza turǵanyn jaqsy kóretin adam edim. Sondyqtan dalanyń, qoǵamnyń, memlekettiń jumysyn da ózgeniki demeımin, ózimdikindeı atqaramyn. Al jaqsy ortany, qoǵamdy jasaıtyn myna árqaısymyz. Adal eńbegime qaraı tabysymdy da ýaqytynda alyp otyrmyn. Ómirlik ustanymdarymnyń biri – «Jurtqa zıanym emes, paıdam tısin!».
P.S. Mine, alyp Almatynyń tazalyǵyna jaýapty jandarmen bolǵan az-kem suhbatymyz osylaı órildi. Al eger siz kóshede kele jatyp, aldyńyzdan qyzǵylt sary jılet kıgen eńbek adamynyń jolyńyzdaǵy qardy kúrep nemese aıaǵyńyzdyń astyn, aıaldamanyń jan-jaǵyn tazalap júrgenin kórseńiz, «Raqmet sizge!» dep aıtýdy umytpańyzshy. Olar iltıpatyńyzǵa sózsiz laıyqty.
"Almaty-akshamy" №152 (6287) 22 jeltoqsan, 2022 jyl