Memleket Basshysy Qasym-Jomart Toqaev «Ádiletti Qazaqstannyń ekonomıkalyq baǵdary» atty Qazaqstan halqyna Joldaýynda medıa, kıno, mýzyka, dızaın, bilim berý, aqparattyq tehnologıalar sıaqty kreatıvti ındýstrıa salalaryn damytý máselesin erekshe atap ótti. Sondaı-aq, bul sektor áli de damymaǵanyn jáne elimizde kreatıvti ekonomıkanyń qarqyndy ósýi úshin jaǵdaı jasaý qajet ekeni aıtyldy.
Ulttyq kınony qoldaý memlekettik ortalyǵynyń basqarma tóraǵasy Qurmanbek Jumaǵalıdiń aıtýynsha, bul – kınoındýstrıadaǵy mamandarǵa da qatysty aıtylǵan messedj.
«Prezıdent «kreatıvshilerge» jobalardy komersıalandyrý máseleleri boıynsha kómektesý kerek ekenin aıtty. Rasynda, biz qazir jaqsy jobalardyń da nazardan tys qalyp, tabystarǵa jete almaı jatqanyn kórip otyrmyz. Eger kıno salasyna keletin bolsaq, onda daıyn fılmder mindetti túrde tabys ákelýi tıis. Biraq, ókinishke oraı, keıbir shyǵarmashylyq top ókilderi túsirilim aıaqtalǵannan keıin fılmderdi qalaı jarnamalap, jaryqqa shyǵarý kerektigin bilmeıdi. Al keıbir rejıserler óz fılmderin halyqaralyq kınofestıvalderge usyna ma, álde keń prokatqa shyǵara ma – ol jaǵyn aldyn ala oılastyrmaıdy. Sondyqtan bıylǵy pıchıngti ótkizgennen keıin, biz kınematografısterge qandaı tetikter arqyly jergilikti deńgeıde, tipti qalaı halyqaralyq naryqqa shyǵýǵa bolatynyn túsindirý maqsatynda trenıńter uıymdastyrýdy josparlap otyrmyz», – dedi Qurmanbek Jumaǵalı.
Sondaı-aq, ol bıyl tamyz aıynda Ulttyq kınony qoldaý memlekettik ortalyǵy kınoteatr ókilderimen, kınodıstrıbútorlarmen jáne kınoprodúserlermen kezdesýler ótkizgenin atap ótti.
«Qazir kıno salasynda barlyǵymyzǵa biryńǵaı damý strategıasy qajet. Jalpyǵa túsinikti júıe kerek. Qazir biz qoldanystaǵy erejeler men normatıvtik-quqyqtyq aktilerdi jetildirý maqsatynda sala ókilderimen belsendi kezdesýler ótkizip jatyrmyz. Sondaı-aq, ulttyq fılmderge qoldaý kórsetý úshin jyl sońyna deıin kınoteatrlarmen memorandýmdarǵa qol qoıýdy josparlap otyrmyz. Jalpy, bıznes ókilderi otandyq kınonyń damýy jolynda barynsha qoldaý kórsetýge jáne bizben tyǵyz baılanysta bolýǵa daıyn. Meniń oıymsha, qazir «kreatıvshiler» Prezıdenttiń erekshe qoldaýyn sezinýde», – dedi Qurmanbek Jumaǵalı.