Almaty Qanysh Sátbaevty eske aldy.
QR Ulttyq kitaphanasynda kórnekti geolog-ǵalym, Ulttyq ǵylym akademıasynyń negizin qalaýshy jáne tuńǵysh prezıdenti akademık Qanysh Sátbaevtyń týǵanyna 125 jyl tolýyna oraı «Álem tanyǵan qazaqtyń Qanyshy» atty eske alý keshi ótti, dep habarlaıdy Almaty-akshamy.kz
Alqaly jıynǵa Qazaqstan Respýblıkasy Prezıdenti janyndaǵy Ulttyq ǵylym akademıasynyń pánaralyq ǵylym ortalyǵynyń dırektory Qýantar Dáýlenuly, Qanysh Sátbaevtyń nemereleri, geolog Aleksandr Tretákov pen hımıa ǵylymdarynyń doktory, profesor Álıma Jarmaǵambetova, Qazaqstan Respýblıkasy Ulttyq ǵylym akademıasynyń akademıgi, geologıa-mıneralogıa ǵylymdarynyń doktory Sultan Ozdoev jáne Qazaqstan Respýblıkasy Ulttyq ulany «Ońtústik» óńirlik qolbasshylyǵynyń tárbıe jáne áleýmettik-quqyqtar jumystar basqarmasynyń ofıseri aǵa leıtenant Maqsat Jaqsylyqov pen Almaty garnızonyna qarasty Ulttyq ulannyń jeke quramy, stýdentter men oqýshylar qatysty.
İs-sharanyń maqsaty – qazaqtyń mańdaıyna bitken birtýar perzenti Qanysh Sátbaevtyń ǵylymı murasyn keńinen nasıhattaý. Ǵalymnyń jan-jaqty, tabandy, izdenimpaz kasıetterin jastar arasynda dáripteý.
Taǵlymdy keshke jıylǵan qonaqtar eń aldymen Ulttyq kitaphana qorynan uıymdastyrylǵan «Qanysh – qazaq qazynasy» atty akademıalyq kitap jáne merzimdi basylymdar kórmesin tamashalady. Sondaı-aq, Q.Sátbaev atyndaǵy memorıaldyq mýzeı eksponattaryn, arhıvtik fotsýretter usynylǵan kórmeni murajaıdyń bólim meńgerýshisi Baqytjamal Aıtmuhambetova jáne Sátpaev ýnıversıteti mýzeıiniń jádigerlerin Sátbaevtanýshy, osy bilim ordasynyń tarıh mýzeıiniń bas mamany Aspandıar Ádenuly tanystyrdy.
Jıynnyń ekinshi bólimi dóńgelek ústel basynda órbidi. Qonaqtar Qanysh Sátbaevtiń ómiri men ǵylymı jetistikteri týraly oı-tolǵamdarymen bólisti. Muqaǵalı Maqataev atyndaǵy №140 gımnazıanyń oqýshylary ǵalymǵa arnaǵan óleń joldaryn oqydy.
Ulttyq ulannyń sarbazdary, stýdentter men oqýshylar Qazaqstan ǵylymyna jan-tánimen qyzmet etken tulǵanyń ómiri men qyzmet joly jaıly maǵlumdy málimet alyp, oı kókjıegin keńeıtti.