100 dombyrashy sý tasqynynan zardap shekken turǵyndarǵa kómek kórsetken azamattarǵa alǵys aıtyp, erekshe fleshmob ótkizdi
Olar ashyq aspan astynda kúı oryndap, óneri arqyly otandastaryna qoldaý kórsetti. Artıser keremet týyndylar ulttyq rýhty kóterip, qazaqstandyqtardy qanattandyratyna senimdi.
Aıta keteıik, keshe almatylyqtar tabıǵı apattan zardap shekken Atyraý oblysynyń turǵyndaryna 30 tonnadan astam gýmanıtarlyq kómek jınady. Bul 12 tonna azyq-túlik, shamamen 10 tonna kıim, 7,2 tonnadan astam gıgıenalyq zattar, 2 tonnadan astam turmystyq zattar, 200 keliden astam dári-dármek jáne t.b. Bul baǵyttaǵy jumys jalǵasyp otyr.
Sondaı-aq, almatylyq aspapshy-mýzykanttar qala turǵyndaryn tabıǵatqa uqypty qaraýǵa, qalada tazalyq pen tártipti saqtaýǵa shaqyrdy. Bul fleshmobqa «Alataý» fólklorlyq ansambliniń dombyrashylary men jas talanttar qatysty.
«Mundaı jaǵdaıda shette qala almaımyz, eriktiler retinde de qatysamyz, sonymen birge biz óz emosıamyz ben qoldaýymyzdy shyǵarmashylyǵymyz arqyly kórsetemiz. Sondyqtan halyqty jigerlendirý, qýattandyrý jáne qoldaý úshin qazaq kúılerin oryndaýdy uıǵardyq. Bizdiń halqymyz árqashan bireýdiń qasiretine beı-jaı qaramaıtyn, tabıǵatqa úlken qurmetpen qaraıtyn, tazalyq pen tártipti baǵalaıtyn. Qazir Almaty turǵyndary aýqymdy ekologıalyq jobaǵa qatysyp, azamattyq belsendilik tanyta alady», - dedi belgili artıs, «Alataý» fólklorlyq ansambliniń jetekshisi Tursynaı Pazyl.
Esterińizge sala keteıik, qalada «Almaty – bizdiń ortaq úıimiz» naýqany ótip jatyr. Megapolıstiń árbir turǵynyn ekologıalyq mádenıetti qalyptastyrýǵa baǵyttalǵan is-sharalarǵa qatysýǵa, ekologıalyq jobalardy qoldaýǵa shaqyramyz. Qala turǵyndary óz aýlasynyń aýmaǵyna kóshet otyrǵyza alady, osylaısha qalaǵa degen súıispenshilik pen qamqorlyqty kórsetip, 20 sáýirde ótetin jalpyqalalyq senbilikke qatysa alady.
Barlyq aqparat almaty.kz saıtynda, Almaty ákimdiginiń áleýmettik jelilerinde ornalasqan. Sondaı-aq, veb-saıtqa arnaıy QR-kod arqyly qala boıynsha ornalastyrylǵan bannerlerde, plakattarda jáne afıshalarda kirýge bolady.
Naýqannyń belsendi qatysýshylaryna arnalǵan áleýmettik jelidegi heshtegter: #AlmatyNashObshııDom, #NasMnogoGorodOdın, #AlmatyBizdińOrtaqÚıimiz, #BizKóppizQalajalǵyz.