Qazaqstan Respýblıkasy Premer-Mınıstriniń orynbasary – Syrtqy ister mınıstri Murat Nurtileý Horvatıanyń Syrtqy jáne eýropalyq ister mınıstri Gordan Grlıch-Radmannyń shaqyrýymen Horvatıa Respýblıkasyna resmı saparmen keldi.
Qazaqstannyń syrtqy saıası vedomstvosy basshysynyń Zagrebke sapary qazaq-horvat yntymaqtastyǵynyń damýyna jańa sapaly serpin beretin ekijaqty qatynastar tarıhyndaǵy alǵashqy sapar, dep habarlaıdy aqshamnews.kz Syrtqy ister mınıstrligine silteme jasap.
Taraptar saıası dıalogty, saýda-ekonomıkalyq jáne ınvestısıalyq ózara is-qımyldy, sondaı-aq mádenı-gýmanıtarlyq baılanystardy nyǵaıtýdy qosa alǵanda, ekijaqty yntymaqtastyqtyń keń aýqymdy máselelerin talqylady. Qazaqstan men Horvatıa energetıka, kólik, sonyń ishinde azamattyq avıasıa, aýyl sharýashylyǵy, sıfrlandyrý jáne ınovasıa, sondaı-aq bilim berý jáne týrızm sıaqty salalarda ózara tıimdi yntymaqtastyqty tereńdetý úshin aıtarlyqtaı áleýetke ıe ekendigi atalyp ótti.
QR SİM basshysy Horvatıa Qazaqstannyń Balqan men Eýropalyq Odaqtaǵy burynnan kele jatqan jáne jaqyn seriktesi ekenin málimdedi.
«Biz dostyq pen ózara senimge negizdelgen barlyq deńgeıdegi maǵynaly saıası dıalogymyzdy joǵary baǵalaımyz. Ekonomıkalyq ózara is-qımyl – qazaq-horvat qatynastarynyń negizgi baǵyttarynyń biri», – dedi M.Nurtileý.
Horvatıa Qazaqstannyń Ońtústik Shyǵys Eýropadaǵy saýda seriktesteri arasynda úshinshi orynǵa ıe. 2023 jyldyń qorytyndysy boıynsha ózara taýar aınalymy 432 mln AQSH dollaryn qurady.Osy turǵyda ekinshi otyrysy 2025 jyly Astanada ótýi josparlanǵan Saýda-ekonomıkalyq yntymaqtastyq jónindegi úkimetaralyq komısıanyń jumysyn jandandyrý týraly ýaǵdalastyqqa qol jetkizildi.
Óz kezeginde Horvatıanyń mınıstri Zagreb Astanamen qarym-qatynasty odan ári ilgeriletýge múddeli ekenin jáne ózara qyzyǵýshylyq týdyratyn barlyq salalarda ózara tıimdi áriptestikti ilgeriletý úshin barlyq kúsh-jigerdi jumsaýǵa daıyn ekenin jetkizdi.
Halyqaralyq kún tártibiniń ózekti máseleleri, sondaı-aq BUU, EQYU jáne basqa da kópjaqty qurylymdar aıasyndaǵy ózara is-qımyl jóninde pikir almasyldy. Ortalyq Azıa men Balqandaǵy áriptestik aspektilerine, jahandyq jáne óńirlik turaqtylyqty qamtamasyz etý máselelerine erekshe nazar aýdaryldy.
Kezdesý qorytyndysy boıynsha Qazaqstan Syrtqy ister mınıstrligi men Horvatıa Syrtqy jáne eýropalyq ister mınıstrligi arasyndaǵy 2025-2027 jyldarǵa arnalǵan yntymaqtastyq baǵdarlamasyna, sondaı-aq QR Memlekettik basqarý akademıasy janyndaǵy Dıplomatıa ınstıtýty men Horvatıa dıplomatıalyq akademıasy arasyndaǵy yntymaqtastyq týraly Memorandýmǵa qol qoıyldy.