Májilis zań jobasyn maquldady.
Jeke tulǵalardyń problemalyq mıkrokredıtterin keshirgen mıkroqarjy uıymdarynyń kiristerine úsh jyl boıy salyq salynbaıdy, dep habarlaıdy Almaty-akshamy.kz
Negizgi zań jobasy aıasynda balalarǵa Ulttyq qordyń tabysynan aýdarylatyn nysanaly jınaqtardy salyqtan bosatý usynylǵan. Parlament májilisi tıisti túzetý kózdelgen zań jobasyn birinshi oqylymda maquldady.
Májiliste depýtattardyń bastamasymen ázirlengen Calyq kodeksine ózgerister men tolyqtyrýlar engizý jónindegi jáne oǵan ilespe salyq salý máseleleri boıynsha zań jobalary qaraldy.
Májilismen Mádı Takıevtiń aıtýynsha, zań jobalarynyń negizgi normalary prezıdenttiń keıbir tapsyrmalaryn jáne Konstıtýsıalyq sottyń sheshimderin júzege asyrýdy zańnamalyq turǵyda qamtamasyz etýge baǵyttalǵan.
"Búgingi kúni barshamyzdy tolǵandyryp júrgen ózekti máselelerdiń biri halyqtyń shamadan tys kredıt alýyn azaıtý úshin jeke tulǵalardyń bereshegi mıkroqarjylyq uıymdarmen, kolektorlyq agenttiktermen keshirilgen kezde qalyptasatyn kiristerdi salyq salýdan bosatý kózdelip otyr. Jeke tulǵalardyń problemalyq mıkrokredıtteri esepten shyǵarylýyna baılanysty mıkroqarjy uıymdarynyń kiristerin salyq salýdan ýaqytsha, ıaǵnı úsh jylǵa bosatý qarastyrylǵan", - dedi Takıev tómengi palatanyń otyrysynda.
Negizgi zań jobasy aıasynda balalarǵa Ulttyq qordyń tabysynan aýdarylatyn nysanaly jınaqtardy salyqtan bosatý usynylǵan.
Sondaı-aq elimizdiń azamattary men zańdy tulǵalary sotqa júgingende aıqyndalǵan memlekettik bajdy tóleýge múmkindigi bolmaǵan jaǵdaıda, konstıtýsıalyq quqyǵyn tolyq paıdalanýyn qamtamasyz etý úshin osy tólemdi keıinge qaldyrý tetikteri kózdelip otyr.
Ekinshi deńgeıli bankterdiń Ulttyq bank notalary boıynsha salyq salynatyn kirisin azaıtýǵa múmkindik beretin quqyǵyn alyp tastaý josparlanýda.
"Mundaı qadam olardy bos qarajattary esebinen ekonomıkanyń naqty sektoryn, sonyń ishinde bıznesti kredıtteýge baǵyttaıdy degen senimmen jasalyp otyr", - deıdi májilismen.
Buǵan qosa barlyq arnaıy ekonomıkalyq aımaqtyń tıimdiligin arttyrý maqsatynda olardyń qatysýshylaryna salyqtyq jeńildikter berýdiń saralanǵan tásilin engizý usynylady.
Odan bólek, EAEO aıasynda alkogól jáne temeki ónimderine aksızderdiń stavkalaryn kezeń-kezeńimen arttyrý jumysy aıasynda syra qaınatý ónimderine aksız stavkalaryn lıtrine 79 teńgeden 90 teńgege deıin kóterý josparlanyp otyr.
Sonymen qatar, salyqtyq ákimshilendirýge qatysty qoldanystaǵy Salyq kodeksiniń keıbir normalary naqtylandy. Onyń ishinde jeke tulǵalardyń kiristeri men múlikterin jalpyǵa birdeı deklarasıalaý naýqanynyń alǵashqy eki kezeńiniń ótý nátıjelerin eskere otyryp, aldaǵy deklarasıalaý úrdisine biraz jeńildikter engiziledi.
Májilis depýtattary zań jobalaryn birinshi oqylymda maquldady.