«QazMunaıGazdyń» kompanıasynyń basqarma tóraǵasy Maǵzum Myrzaǵalıev munaı tıegen tankerlerdiń Túrkıa jaǵalaýynda keshigýi Qazaqstan ekonomıkasyna qalaı áser etetinin aıtty, dep habarlaıdy QazAqparat tilshisi.
«Búkil saqtandyrý prosedýralary ótkizilgen bolatyn. Atalǵan 6 tankerdegi munaıdyń Qazaqstannnan shyqqany týraly sertıfıkattardy Túrkıa tarapyna berildi. Qazir dıalog jalǵasyp jatyr. Men keshe keshke bizdiń Syrtqy ister mınıstrimen de, Ankaradaǵy Elshimen de sóılestim. Bizdiń dıplomattar bizge tıisti, qajetti kómek kórsetip jatyr. Másele 1-2 kúnde sheshiledi degen úmitimiz bar. Saqtandyrý týraly aıtsaq, onyń basym bóligi brıtanıalyq, eýropalyq kompanıalar. Saqtandyrý prosedýraly tıanaqty tyndyrylǵan», - dedi «QazMunaıGaz» basshysy.
Onyń aıtýynsha, másele jýyqta sheshimin tapsa, bushl jaǵdaı Qazaqstan munaıynyń baǵasyna keri áser etpeýi kerek.
«Bul bizdiń ekonomıkamyzǵa eshqandaı shyǵyn ákelmeıtinin aıttym. Óıtkeni jyl saıyn jeltoqsan aıynda Bosfordan tankerlerdiń ótý ýaqyty 14 kúnge deıin barady. Ekonomıkaǵa shyǵyn biz munaı óndirý kólemin qysqartyp jatsaq keler edi. Iaǵnı, buǵan deıin qansha qarqynmen munaı shaıqasaq, qazir de sol kólemde shaıqap jatyrmyz. Tek tankerlerge tıelip, Bosfor arqyly aqyryndap jyljyp jatyr», - dedi Maǵzum Myrzaǵalıev.
Sondaı-aq ol Qazaqstan muhıtqa Bosfor arqyly ǵana emes, Qara teńiz arqyly da shyǵa alatynyn eske saldy.
«Rýmynıa jáne Bolgarıa baǵyttary bar. Qazir jaǵdaı shetin deýge kelmeıdi. Biraq qazir biz ony sheshýmen qyzý aınalysyp jatyrmyz. Bul másele jýyq arada sheshiledi dep oılaımyz. Sondyqtan bizdiń baǵalaýymyzǵa munaı baǵasynda kórinis tappaýy kerek. Qazirgi táýekel shekten tys bir mejeden asyp ketken joq», - dedi «QazMunaıGaz» basshysy.