Bul másele Qazaqstan Úkimetiniń erekshe baqylaýynda.
Jambyl oblysy aýmaǵynda transshekaralyq ózender boıynda sý qoımasyn salý máselesi Úkimettiń erekshe baqylaýynda. Bul jaıynda QR Premer-Mınıstri Álıhan Smaıylovtyń Senat depýtattarynyń saýalyna bergen jaýabynda aıtylǵan, dep habarlaıdy Almaty-akshamy.kz QazAqparatqa silteme jasap.
«Jambyl oblysy aýmaǵynda transshekaralyq ózender boıynda sý qoımalaryn salý qajettigi («Aqmola», «Qalǵuty», «Yrǵaıty») - sýdy únemdi paıdalaný esebinen ónimdilikti arttyrý jónindegi strategıalyq mindetti iske asyrýdaǵy 2021-2025 jyldarǵa arnalǵan «Jasyl Qazaqstan» ulttyq jobasy is-sharalarynyń biri. Joba boıynsha 2022 jylǵa arnalǵan respýblıkalyq búdjetti naqtylaý aıasynda jobalyq-smetalyq qujattamasyn ázirleýge 243,4 mln teńge somasyna tıisti búdjettik ótinim qaralyp jatyr», - dep atap ótedi Úkimet basshysy.
Onyń aıtýynsha, joǵaryda kórsetilgen jobalardy iske asyrý óńirdegi aýyl sharýashylyǵy daqyldarynyń ónimdiligin arttyrýǵa jáne tutastaı alǵanda azyq-túlik qaýipsizdigin qamtamasyz etýge baǵyttalǵanyn eskere otyryp, málimdelgen shyǵystar búdjet zańnamasynyń talaptaryna sáıkes basym tártippen qaralady.
«Jalpy, Jambyl oblysy aýmaǵynda transshekaralyq ózender boıynda sý qoımasyn salý máselesi Úkimettiń erekshe baqylaýynda», - dedi Álıhan Smaıylov.