Bir aı boıy mamandar aqbókenderdiń sanyn anyqtaý jumystaryn júrgizedi.
Bıyl olardyń sany 1,5 mıllıonǵa jýyqtaýy múmkin degen boljam jasaldy, dep habarlaıdy Almaty-akshamy.kz Almaty arnasyna silteme jasap.
Alaıda janýardyń múıizine qyzyǵyp, atyp alýdan taıynbaıtyn qaskóılerden tóngen qaýip te azaıar emes. Qazir olardyń tóldeıtin ýaqyty. Iaǵnı esepke alýǵa naǵyz yńǵaıly kezeń. Betpaqdala popýlásıasynda ótken jyly 300 myńǵa jýyq aqbóken tirkelgen. Bıyl olardyń sany odan da kóp bolady dep boljam jasap otyr mamandar. Qazir janýarlardy kúndelikti áýeden baqylap, sanaý jumystaryn júrgizýde.
Mamandar jylyna bir ret dál osylaı aqbókenderdi áýeden barlaıdy. Arnaıy qurylǵy arqyly kıikterdiń sany anyqtalady. Betpaqdala popýlásıasy aqbókender sanynyń kóptigimen erekshelenedi. Quramyna Qaraǵandy, Aqmola, Pavlodar, Qostanaı oblystary kiredi. Jalpy aýmaǵy - 56 mıllıon gektar jer.
Jalpy, kıikterdiń meken etýi Betpaqdala, Ústirt jáne Oral popýlásıalaryna bólinedi. Bul – elimizdiń barlyq óńirleri aqbókender mekenine aınalyp jatqanynyń aıǵaǵy. Bıyl áýede kıikterge sanaq júrgizý úshin 200 saǵat bólingen.