Densaýlyq mınıstrligi dári-dármek qoryna qatysty málimdeme jasady.
Mınıstrlik jalǵan aqparat taratpaýǵa, dúrlikpe týdyrmaýǵa jáne tek resmı málimetke senýge shaqyrdy, dep habarlaıdy Almaty-akshamy.kz
Vedomstvo ınsýlın men basqa da negizgi dári-dármek «tapshylyǵy» bolýy múmkin degen BAQ-ta jaryq kórgen maqalaǵa jaýap berdi.
«Búgingi tańda Qazaqstanda bólshek saýda segmentinde dárilik zattardyń bar-joǵy monıtorıńine sáıkes tapshylyq baıqalmaıdy. Preparattardyń qoljetimdiligi maqsatynda dárilik zattardyń turaqtandyrý qorlary jumys isteıdi, iri kóterme dárihana qoımalarynda qor qalyptastyrylǵan», - delingen aqparatta.
2022 jylǵa Áleýmettik medısınalyq saqtandyrý qory men tegin medısınalyq kómektiń kepildik berilgen kólemi sheńberinde 11,1 mıllıard teńge somaǵa ınsýlınniń 20 túri satyp alynǵan.
Mınıstrlik aqparatyna sáıkes, biryńǵaı dıstrıbútordyń qoımalarynda ınsýlınniń jetkilikti qory bar.
«Insýlın halyqqa dáriger resepti boıynsha, sondaı-aq dıspanserlik esepte turǵan pasıentterge tegin beriledi. Demek, bul preparattar esepte tur. Olardy reseptimen bosatý, esepke alý jáne saqtaý qaǵıdalarymen reglamentteledi. Mınıstrliktiń erekshe baqylaýynda bolady», - dedi mınıstrlikte.
Vedomstvo ókilderi dári-dármekterdiń bólshek baǵasy belgilengen shekti baǵa aıasynda qalyptasatynyn atap ótti.
«Dári baǵasyn memlekettik retteýdiń arqasynda suranys pen satýdyń maýsymdylyǵyn, sondaı-aq jyl saıynǵy ınflásıany eskere otyryp, baǵalardy ońtaıly deńgeıde ustap turýǵa bolady», - dep jazylǵan aqparatta.
Dárige belgilengen shekti baǵany asyrǵany úshin «Ákimshilik quqyqbuzýshylyq týraly» Kodekstiń 426-baby boıynsha ákimshilik jaýapkershilik kózdelgen.
Insýlın - bul temperatýra rejımin saqtaýdy qajet etetin aqýyz. Sondaı-aq, arnaıy saqtaý talaptary men jedel jetkizý sharttary eskerilmese, ınsýlın buzylyp ketýi múmkin.
Mınıstrlik jalǵan aqparat taratpaýǵa, dúrlikpe týdyrmaýǵa jáne tek resmı málimetke senýge shaqyrdy.