Altynnyń resmı quny 1 gram úshin 27 247,9 teńgeni qurady.
Qazaqstannyń Ulttyq bankiniń málimetinshe, 21 jeltoqsandaǵy altynnyń resmı quny 1 gram úshin 27 247,9 teńgeni quraǵan. Bul 16 tamyzdan bastap, ıaǵnı 4 aıdan astam ýaqyttan beri eń joǵary kórsetkish bolyp otyr, dep habarlaıdy Almaty-akshamy.kz Inbusiness.kz silteme jasap.
4 qarashada altyn quny 24,2 myń teńgeden az boldy. Bul 2021 jyldyń qazan aıynan bastap eseptegende eń tómen kórsetkish. Kelesi bir jarym aı ishinde bir gram baǵaly metaldyń quny 3,1 myń teńgege nemese 12,8%-ǵa ósti.
Resýrstyń málimetinshe, altynnyń álemdik baǵasynyń ósýine dollardyń álsireýi, naryqtardyń quldyraýy jáne geosaıası jaǵdaıdyń shıelenisýi áser etip otyr. Baǵaly metalǵa degen qyzyǵýshylyq artyp keledi.
Iaǵnı, ınvestorlar qarjy naryǵynda turaqsyzdyq paıda bolǵan kezde altynǵa basymdyq bere bastaıdy. Bul óz kezeginde baǵaly metal baǵasynyń kóterilýine ákeledi.