Qaraǵandy jáne Pavlodar oblystarynyń densaýlyq saqtaý basqarmalaryna preparatty jetkizý boıynsha sharttar jasaldy
Sırek kezdesetin neırofıbromatoz dıagnozy qoıylǵan Qaraǵandy jáne Pavlodar oblystaryndaǵy eki naýqasqa asa qymbat "Selýmetınıb" (Koselýgo) dárisi satyp alyndy. "Qazaqstan halqyna" qory bul dáriniń 36 qaptamasyna 220 mln 644 myń teńge jumsady, dep habarlaıdy Almaty-akshamy.kz.
"Densaýlyq saqtaý basqarmalarynan qajetti qujattar jınalǵannan keıin, osy ótinimderdi Orfandyq aýrýlar jónindegi sarapshylyq komıteti qarap, ony qor basqarmasy bekitkennen keıin dárini satyp alý boıynsha jumystar bastaldy. Qor dári-dármek óndirýshisi eýropalyq AstraZeneca kompanıasyna júgindi, olar dári-dármektiń eki jetkizýshisin usyndy", - delingen qordyń baspasóz qyzmeti taratqan habarlamada.
Jetkizý jáne qarjylandyrý sharttary boıynsha birqatar kelissózderden keıin, sondaı-aq kelisý rásimderi aıaqtalǵannan keıin 2023 jylǵy 31 naýryzǵa deıin Qaraǵandy jáne Pavlodar oblystarynyń densaýlyq saqtaý basqarmalaryna preparatty jetkizý boıynsha sharttar jasaldy. Sebebi, orfandyq quraldar aldyn-ala jiberilgen ótinimder boıynsha ǵana qatań túrde shyǵarylady. Dári-dármekti jetkizýshi belgili bir kólemdi aldyn ala saqtap qoıǵan soń, dári aımaqtarǵa osy jyldyń qańtar aıynyń ortasynda jetkizildi.
"Selýmetınıb" dárisi 1 tıpti neırofıbromatozy bar 3 jastan asqan balalardaǵy sımptomatıkalyq, ota jasaýǵa kelmeıtin pleksıformdy neırofıbromalardy emdeý úshin monoterapıa retinde qoldanylady. Neırofıbromatoz – teride, jumsaq tinderde, júıke júıesinde jáne ishki aǵzalarda qatersiz isikterdiń paıda bolýymen sıpattalatyn tuqym qýalaıtyn aýrý.
"10 jasar Valerıı Demın – "Selýmetınıb" ınovasıalyq dárini alǵan balalardyń biri. Ol Qaraǵandy oblysy Osakarov aýdany Batpaqty aýylynda turady. Dıagnoz 3,5 jyl buryn Valerıı birinshi synypqa barǵan kezde anyqtaldy. Valerıı tabletkalardy bir aı buryn qabyldaı bastady. Jaǵdaıy jaqsaryp, tolyq saýyǵyp shyǵýyna januıasy úmitti bolyp otyr. Valerıı – óte meıirimdi jáne sezimtal bala, janýarlardy jaqsy kóredi jáne bolashaqta veterınar bolǵysy keledi", - delingen habarlamada.
Esterińizge sala keteıik, "Qazaqstan halqyna" qoǵamdyq qory ótken jyldan bastap aýyr jáne sırek syrqaty bar 131 emdelýshige (onyń ishinde 100 bala) 15,5 mıllıard teńgeden astam somaǵa dári-dármek satyp aldy.