Qazaq kınosy tarıhyndaǵy tuńǵysh djýboks-múzıkl «Baqyt qushaǵynda» fılmi Fransıa astanasynda ótken «Festival du Film Kazakh» qazaq kınosy festıvalinde «Úzdik debút» júldesin jeńip aldy, dep habarlaıdy aqshamnews.kz
Kınofestıval 29 qazan men 2 qarasha aralyǵynda Parıjde jetinshi márte ótti.
Fılmniń Fransıadaǵy tusaýkeseri festıváldiń jabylý saltanatynda ótti. İs-sharaǵa kınogerler, synshylar, sarapshylar jáne halyqaralyq kınoqoǵam ókilderi qatysty. Kórermen qatarynda Parıj qalasyndaǵy qonaqtar men jergilikti qazaqtar da kóp boldy. Kórermender «Baqyt qushaǵynda» múzıklyna joǵary baǵa berip, erekshe áser alǵandaryn jetkizdi.
«Baqyt qushaǵynda» – kompozıtor Shámshi Qaldaıaqovtyń ánderine negizdelgen alǵashqy qazaqstandyq djýboks-múzıkl. Týyndyda uly kompozıtordyń 12 áni sımfonıalyq orkestr súıemelimen qaıta óńdelip, saýndtrek retinde jazylǵan. Fılmniń túsirilimi elordada bir aı ishinde tolyqtaı qazaq tilinde ótken. Kórinisterge 230-ǵa jýyq akter qatysqan, eń aýqymdy epızodtardyń birinde 80 adam bir mezette bıleıdi. Kartınanyń rejıseri – Sanat Shapashov. Fılmniń shyǵarmashylyq tobyna kompozıtordyń uly Muhtar Qaldaıaqov pen kelini Botagóz Qaldaıaqova da qoldaý bildirgen.
Múzıkl qazaqtyń mádenı jáne rýhanı qundylyqtaryn jańasha qyrynan kórsetedi. Onda otbasy ınstıtýtynyń máni, analarǵa qurmet pen er azamattyń jaýapkershiligi sıaqty áleýmettik taqyryptar keńinen ashylady.
Aıta ketsek, týyndy 2025 jyldyń 23 qazanynda Shámshi Qaldaıaqovtyń 95 jyldyǵyna oraı úlken ekrandarǵa jol tartqan. Qazir fılm elimizdiń kınoteatrlarynda kórsetilip jatyr. Kórermender áleýmettik jelilerde týyndydaǵy ánderge qosylyp aıtý, kózge jas alý jáne qýanyshqa bólený sátterin bólisip, óz áserlerin bildirýde.
«Baqyt qushaǵynda» múzıkly qazaq kınosynyń jańa belesi retinde ulttyq óner men kreatıvti ındýstrıanyń damýyna serpin berdi.