Árbir eldiń qasıet tutatyn erekshe uǵymdary bolady. Bizdiń halyq úshin osyndaı qasıetterdiń biri – qarttardy qurmetteý. Olar – eldiń altyn dińgegi.
«QR Ulttyq ulannyń óńirlik qolbasshylyǵy ardagerler keńesiniń bastamasymen qurylǵan arnaıy top Qarttar aılyǵy aıasynda qart jaýyngerlerdiń árqaısysynyń shańyraǵyna baryp, amandasyp, qal-jaǵdaılaryn bilip, syı-sıapattaryn usynyp, qolbasshylyqtyń Alǵys hatyn tapsyrdy. Olardyń qatarynda 101 jasqa kelip otyrǵan, áıgili Panfılov dıvızıasynyń qart jaýyngeri Qaıyrly Jońqabaev, otstavkadaǵy polkovnıkter Ǵalymjan Bakıshev, Magomed Maındýrov, Vasılıı Mezın jáne taǵy basqalar bar. Sonymen qatar, qarıalarǵa materıaldyq kómek berýge ásker ardageri Malık Tohtahýnov demeýshilik jasap, úlken kómek berdi», – deıdi podpolkovnık Baqyt Álipbaev.
«Ońtústik óńirde áskerı salada eńbek etken qart ardagerlerimiz barshylyq. Almatynyń ózinde 30-ǵa tarta qarıamyz bar. Abyz aqsaqaldar biz úshin naǵyz eńbekqor tulǵanyń úlgisi bolsa, jastarymyz úshin tárbıeniń qaınar bulaǵy. Sondyqtan aldyńǵy býyn atalarymyzdyń deni saý, ǵumyry uzaq bolsyn, aqsaqaldarymyzdyń otyrǵan orny jastar júginetin, olarǵa jol silteıtin aq orda bolsyn», – deıdi ardagerler keńesiniń tóraǵasy, zapastaǵy polkovnık Asatolla Qulahmetov.
El tynyshtyǵyn tilep, batasyn bergen ardagerler ózderine kórsetilgen qurmetke rızashylyqtaryn bildirdi.