Jelide taǵy bir tort daýy paıda boldy. Aqtóbelik kondıter "Qaıratqa" fýtbol klýbyna arnap tort jasady. Aqtóbelik fýtbol jankúıerleri buǵan narazylyǵyn tanytty, - dep habarlaıdy Aqshamnews.kz tilshisi.
Aqtóbelik kondıter Samal Asanova almatylyq komandanyń Chempıondar lıgasyna shyǵýyna oraı tort pisirip, áleýmettik jelide synǵa ushyrady.
Ol tort ázirleý barysyn vıdeoǵa túsirip jarıalaǵan. Keıin aqtóbelik jankúıerler oǵan boıkot jarıalady.
"Aqtóbede fýtbol bul jaı ǵana oıyn emes, ol - aqtóbeliktiń ajyramas bóligi. Aqtóbeden shyqqan kásipkerdiń mundaı áreketi orynsyz ári laıyqsyz dep sanaımyz. Biz óz ustanymymyzdy ótkinshi haıpqa aıyrbastamaımyz!" - dep jazǵan fýtbol jankúıerleri.
Kondıter fýtboldan habary joǵyn, bar bolǵany qazaqstandyq sportshylardy qoldaǵanyn aıtty.
"Jigitter vıdeony óshirdim. Sizderge fýtboldan habarym joǵyn, tek elimizden shyqqanǵa qoldaý retinde jasaǵanymdy myń ret aıttym. Mende ár túrli taqyrypta kontentter túsiriledi. Erteń "Aqtóbege" arnap kúshti tort jasaımyn. Bir bolmaıtyn dúnıeden óz qalamyzdyń masqarasyn shyǵarmaıyqshy jáne meni balaǵattaýdyń qajeti joq. Ana, ápke, qaryndastaryńyz bar shyǵar. Men - jalǵyzbasty anamyn, osy úlken kásipti nólden bastap kóterip, eńbek etip kelemin. Qanshama uıqysyz túnder ótti?! Tek Aqtóbeniń ózinde 550 adam jumys jasaıdy, basqa qalalardy qospaǵanda. Qanshama jastardy qoldaǵan proektterim bar. Meniń bir áke, kókem joq. Taza eńbek! Bar bolsa eshqashan aıaǵan emespin. Admın osynda ýshyqtyrmaı, nege jekeme jazbadyńyz, túsindirip. Kishkene shalys bassań, ári qaraı shaldyrýdyń qajeti joq. Jekege de endi ǵana jazyp jatyr, barymsha túsindirgendeı boldym. Bárińizge sáttilik", -dedi kondıter.
Eske salaıyq, buǵan deıin áleýmettik jelide kondıter men blogerdiń daýy qyzdy. Bloger týǵan kúnine tapsyrys bergen tortty kondıter 600 myń teńgege baǵalaǵan. Zańgerdiń aıtýynsha, baǵa mereke kúni ǵana aıtylǵan. Alaıda tort quny áli tólenbegen. Kondıter Nurshat Aqbergenova blogerdi sotqa beretinin aıtty.