Elimizdiń mektepterinde otbasylyq qundylyqtar men dástúrlerdi qoldaý jáne mektep pen ata-ana arasyndaǵy yntymaqatastyqty nyǵaıtýǵa baǵyttalǵan «Otbasym – maqtanyshym» taqyrybynda keń aýqymdy aksıa bastaldy.
Aksıa 12-16 qyrkúıek aralyǵynda barlyq orta bilim berý uıymdarynda ótedi jáne oǵan 1 mıllıonnan astam ata-ana qatysady dep kútilýde. Joba aıasynda 10 myńnan astam aýqymdy is-shara ótkizý josparlanýda, dep habarlaıdy aqshamnews.kz Oqý-aǵartý mınıstrligine silteme jasap.
Basty basymdyq balalardy oqytý men tárbıeleýde otbasy men mekteptiń ózara yntymaqtastyǵyn kúsheıtý, pozıtıvti ata-ana mádenıetin damytý jáne balalardyń úılesimdi damýy úshin bilim berý mekemelerinde qolaıly orta qalyptastyrý bolyp tabylady.
«Bir apta ishinde elimizdiń bilim berý mekemeleri shyǵarmashylyq konkýrstar, sheberlik synyptaryn, otbasylyq taqyryptyq oıyndar jáne taǵy basqa aýqymdy is-sharalar baǵdarlamasyn ótkizedi. Mektep psıhologtary men pedagogter bala men ata-ananyń ózara qarym-qatynasyn jaqsartý úshin ınteraktıvti trenıńter ótkizedi. Aksıa otbasylyq jáne ulttyq dástúrlerge arnalǵan aýqymdy merekemen qorytyndylanady», - deıdi «Órken» BÁAUǴPI-nyń birinshi vıse-prezıdenti Elena Sakenova.
«Otbasym – maqtanyshym» aksıasy «Birtutas tárbıe» baǵdarlamasy aıasynda qurylǵan mektepterdegi Ata-analarǵa pedagogıkalyq qoldaý kórsetý ortalyqtarynyń uıymdastyrýymen ótkiziledi.