Astanada 5-6 qazan kúnderi «Nobel Fest: Sıfrlyq Apgreıd» festıvali ótedi, dep habarlaıdy Almaty-akshamy.kz.
Bul týraly Astana qalysy ákimdiginiń resmı saıtynda habarlandy.
Onyń alańynda Nobel syılyǵynyń laýreattary, ǵylym, aqparattyq tehnologıalar, ekonomıka jáne ınovasıalar salasyndaǵy jetekshi mamandar jınalady.
Nobel Fest 5 jáne 6 qazanda Tuńǵysh Prezıdent murajaıynda ótedi. Spıkerler ǵylymı-tehnıkalyq progrestiń eń ozyq teorıalary men tájirıbesin taldaıtyn bolady. Festıvál baǵdarlamasy jasandy ıntellekt, klımattyń ózgerýi, ekonomıka bolashaǵy, startaptar men zamanýaı eńbek naryǵy, ǵylymnyń jańa qyrlary, adamzat bolashaǵy sekildi ózekti máselelerdi qamtıdy.
Festıváldiń negizgi taqyryptary:
- Tehnologıalyq sıngýlárlyq dáýiri;
- Belgisiz álem: jasandy ıntellekt dáýiri;
- Sıfrlyq álemdegi adam mıynyń resýrstary: sıngýlárlyq nemese sana jolynda;
- Kópplanetalyq órkenıet pen ǵarysh týrızminiń qurylysy;
- Ǵylym men bilim damýynyń jańa qyrlary;
- Jahandanýdyń aıaqtalýy jáne álemniń jańa ekonomıkasy;
- «Unicorn» startapty qalaı qurýǵa bolady ne tehnologıa alpaýyttarynyń damýyna qandaı jaǵdaı jasaý kerek?
- Eńbek pen adamı kapıtaldyń bolashaǵy.
Festıválde Ǵylym jáne joǵary bilim mınıstri Saıasat Nurbek, qazaqstandyq saıasattanýshy Dosym Sátbaev, sondaı-aq ekonomıka boıynsha Nobel syılyǵynyń laýreaty, álemniń úsh úzdik ekonomısiniń biri Djeıms Hekman, Beıbitshilik salasyndaǵy Nobel syılyǵynyń ıegeri, klımat jáne turaqty damý boıynsha №1 sarapshy Rae Kvon Chýng, álemge áıgili fýtýrolog, ınovasıadaǵy úzdik úsh yqpaldy kóregenniń biri (Wired), «Tehnologıa adamǵa qarsy» bestselleriniń avtory Gerd Leongard, álemdegi eń tanymal avtokólik dızaıneri Frenk Stıvenson jáne t.b.
Festıváldiń basty maqsaty – myńdaǵan qazaqstandyqtyń bilimge, ǵylymǵa jáne ınovasıaǵa qyzyǵýshylyǵyn arttyrý.
Jyl saıyn Nobel Fest 100 elden 500 myńǵa jýyq qatysýshy men 500 ýnıversıtetti biriktire otyryp, jarqyn bolashaqty qalyptastyrýdaǵy jan-jaqty bilimniń mańyzyn aıshyqtaıdy.