Almatydaǵy Kardıologıa jáne ishki aýrýlar ǵylymı-zertteý ınstıtýtynda emdeý jáne medısınalyq ońaltýmen mamandandyrylǵan kardıologıalyq jáne terapevtik medısınalyq kómek kórsetiledi, dep habarlaıdy Almaty-akshamy.kz QazAqparat-qa silteme jasap.
Kardıologıa jáne ishki aýrýlar ǵylymı-zertteý ınstıtýtynyń basqarma tóraıymy, medısına ǵylymdarynyń doktory, profesor Roza Qýanyshbekovanyń aıtýynsha, naýqastar ońaltý kómegin turǵylyqty jerine qaramastan ala alady. Bul - Nur-Sultan, Almaty qalalarynan bólek, Aqtóbe, Atyraý, Batys Qazaqstan, Jambyl, Qaraǵandy, Qostanaı, Qyzylorda, Mańǵystaý men Túrkistan oblystarynan keletin pasıentter. Klınıka basshysy aıtyp ótkendeı, júrgiziletin kardıologıalyq ońaltý aýyr kardıologıalyq syrqatqa (mıokard ınfarkti, jiti koronarlyq sındrom, endovaskýlárlyq aralasýlar, koronarlyq shýnttaý jáne júrek, onyń qaqpaqshalary men tamyrlaryna jasalǵan basqa hırýrgıalyq aralasýlar) shaldyqqan pasıentke kómek kórsetýge baǵyttalǵan is-sharalar kesheninen turady.
Kardıologıalyq ońaltýǵa emdik dene shynyqtyrý, mólsherlengen jaıaý júris, velotrenajerda jattyǵý, temeki shegýden bas tartý, lıpıdterdiń salmaǵy men deńgeıin qalpyna keltirý, sondaı-aq kardıovaskýlárlyq patologıanyń qaýip faktorlaryn azaıtýǵa múmkindik beretin psıhologıalyq qoldaý kiredi.
«Kardıologıalyq ońaltýda densaýlyqty saqtaý, qalpyna keltirý, dene qımylynyń belsendiligi, eńbekke jaramdylyq, áleýmettik belsendilik; fızıkalyq belsendiliginiń keńeıýin eskere otyryp, júrek-qantamyr patologıasynyń asqynýy men órshýiniń aldyn alýǵa arnalǵan dári-dármektik terapıany ońtaılandyrý, aýrýdyń saldaryn joıý úshin naýqastyń psıhologıalyq jaǵdaıyn retteý sekildi aspektiler óte mańyzdy», - deıdi Roza Tohtanalyqyzy.
Kardıologıalyq ońaltýdaǵy mańyzdy faktor - ınstıtýtta qurylǵan Pasıent mektebine naýqastyń qatysýy. Densaýlyq mektepterinde tek qana bilim almaıdy, sonymen qatar adam ómirine qaýipti aýrýlardyń damýyna áser etetin qaýip faktorlarynan arylý ádisterine oqytady. Pasıentterde emdeý, turmysta jáne jumysta durys minez-qulyq kórsetý máselelerine oń kózqaras qalyptasady.
«Júrek aýrýyna shaldyqqan naýqastarǵa medısınalyq ońaltý múmkindiginshe erte bastalýy tıis. Ońaltý is-sharalary stasıonarlyq kezeń aıaqtalǵannan keıin tolyq kólemde iske asyrylady. Densaýlyqty, jumysqa qabilettilikti jaqsartý, aýrýdyń asqynýynyń aldyn alý, pasıentterdi qoǵamnyń qalypty ómir súrý jaǵdaıyna biriktirý boıynsha jumystar óziniń áserin beredi», - deıdi dáriger.