«Meniń Respýblıkam- meniń  Maqtanyshym!» 

Respýblıka kúni – elimizdiń tarıhyndaǵy eń mańyzdy merekelerdiń biri. Bul kún – Qazaqstan halqynyń egemendik pen táýelsizdik jolyndaǵy jetistikterin dáripteıtin, el birligi men tatýlyǵyn  aıshyqtaıtyn   mereıli mereke.  Qalamyzdaǵy  № 191 bóbekjaı-balabaqsh ujymy da osynaý merekeni zor shabytpen atap ótti. Mektepaldy  «Shabdaly» tobynda  ótken  «Meniń Respýblıkam –  meniń maqtanyshym!» atty merekelik is-sharany  meńgerýshi m.a  E. Ábillmájıt pen   tárbıeshiler A.Jakypova, M.Imamatdınova, mýzyka jetekshisi G. Hakımjanova  zor yqylaspen uıymdastyrdy.  
Óskeleń urpaqtyń boıyna  Otanǵa degen súıispenshilikti arttyrý, patrıottyq sezimderin qalyptastyrý, sondaı-aq Qazaqstan Respýblıkasynyń memlekettik rámizderin, merekelerin tanyp-bilýge baýlý maqsatynda uıymdastyrylǵan kesh shyn máninde maǵynaly ótti.  Bul kúngi merekege tárbıelenýshiler men ata-analar, ustazdar jáne qonaqtar belsene qatysty.
İs-shara saltanatty túrde Qazaqstan Respýblıkasynyń Ánuranymen ashyldy. Balalar men ustazdar qoldaryna kók baıraq ustap, elimizdiń basty  merekesine   aıryqsha qurmet kórsetti. Sharanyń júrgizýshileri Qazaqstan Respýblıkasynyń qalyptasý tarıhy men táýelsizdikke deıingi kúres joldary týraly qysqasha maǵlumat berip, balalardyń nazaryn el tarıhyna aýdardy. Odan keıin búldirshinder ózderiniń jattaǵan óleńderin mánerlep oqyp, kórermenderge erekshe áser syılady. «Otanym – Qazaqstan», «Týǵan jerim – altyn besigim», «Meniń elim» sekildi patrıottyq taqyryptaǵy óleńder arqyly kishkentaılar óz elin súıetinin, onyń bolashaǵyna senimmen qaraıtynyn kórsetti. Mýzykalyq bólimde balalar «Qazaqstan – Otanym!», «Tatýlyq tiregimiz» ánderin shyrqady. Ánniń áýenimen birge aıtylǵan taza da móldir daýystar kórermen júregine qýanysh pen maqtanysh sezimin uıalatty. Al «Muzbalaq» jáne «Has júırikte syn bolmas» atty bıler ulttyq naqyshta oryndalyp, merekeniń sánin kirgizdi. Qazaq halqynyń bı mádenıetin dáriptegen bul kórinister balalardyń shyǵarmashylyq qabiletterin, ónerge degen súıispenshilikterin aıqyndady. Shara barysynda «Rámizderdi tap» atty tanymdyq oıyn da ótkizildi. Bul oıynnyń maqsaty – balalardyń memlekettik rámizder týraly bilimin tereńdetý jáne olardyń mán-maǵynasyn túsindirý boldy. Balalar Tý men Eltańbany sýret arqyly tanyp, olardyń elementterin durys ataýǵa tyrysty. Sonymen qatar, shyǵarmashylyq tapsyrmalar barysynda búldirshinder túrli-tústi qaǵazdardan Tý men Eltańbanyń beınelerin qurastyryp, óz qoldarymen jasaǵan týyndylaryn maqtanyshpen kórsetti. Bul bólimde olardyń uqyptylyǵy men otansúıgishtigi aıqyn baıqaldy.
Merekelik is-sharanyń taǵy bir erekshe sáti – «Qazaǵym» atty fleshmobta  balalar ulttyq kıim kıip, ásem áýen yrǵaǵymen birigip bı bıledi. Bul kórinis sharanyń sharyqtaý shegi boldy.