Memleket basshysy Jazýshylar odaǵynyń tóraǵasy Mereke Qulkenovti qabyldady
Kezdesýde el birligin nyǵaıtý, qoǵamdyq qundylyqtardy dáripteý isinde qalamger qaýymnyń atqaratyn róli qarastyryldy, dep habarlaıdy Almaty-akshamy.kz.
Memleket basshysy Jazýshylar Odaǵy ulttyq ıntellıgensıanyń basyn qosyp otyrǵan qara shańyraq ekenin aıta kelip, aqyn-jazýshylardyń halyq ádebıetin urpaqtan urpaqqa jetkizip, qoǵamnyń birligin nyǵaıtýdaǵy eńbegi zor ekenine nazar aýdardy.
Prezıdenttiń pikirinshe, búgingi ýaqyt talaby basqa. Oqyrmannyń talǵamy, qoǵamnyń qundylyǵy – barlyǵy ózgerip keledi. Sondyqtan shyǵarmashylyq ortanyń jumysy da búgingi zaman talabyna saı bolýy kerek.
Qasym-Jomart Toqaev qazaq ádebıetinde qazirgi oqyrman talǵamyna saı, izdep júrip oqıtyn qyzyq týyndylar jazylýy kerek ekenine aıryqsha toqtaldy. Sonymen qatar jas aqyn-jazýshylardyń shyǵarmashylyǵyna erekshe nazar aýdarý qajet ekenin atap ótip, memleket tarapynan qalamgerlerdi qoldaý sharalary jalǵasa beretinin aıtty.
Mereke Qulkenov Prezıdentke Jazýshylar odaǵynyń jýyrda ótken sezinde talqylanǵan mańyzdy usynystar men uıymnyń aldaǵy jospary jóninde baıandady.
Atap aıtqanda, Jazýshylar Odaǵynyń tóraǵasy Prezıdentke «Mádenıet týraly» zańǵa qazaq jazýshylarynyń shyǵarmalaryn basyp shyǵarýǵa jáne keńinen taratýǵa septigin tıgizetin arnaýly normalar engizý jóninde usynys aıtty.
Sondaı-aq qalamgerlerge jan-jaqty qoldaý kórsetilip jatqany úshin Prezıdentke rızashylyǵyn bildirdi.
