Parlament Senatynyń tóraǵasy Máýlen Áshimbaev búgingi Úkimettiń keńeıtilgen otyrysyna qatysty facebook-tegi paraqshasynda óz pikirin jazdy, dep habarlaıdy Almaty-akshamy.kz
- Memleket basshysy qasiretti qańtar oqıǵasynan keıin Úkimetke jáne barlyq memlekettik organǵa elimizdiń áleýmettik-ekonomıkalyq ahýalyn arttyrý, halyqtyń ómir súrý sapasyn jaqsartý jóninde naqty mindetter júktegen edi. Búgin Úkimettiń keńeıtilgen otyrysynda Qasym-Jomart Kemeluly Toqaev osy baǵytta atqarylyp jatqan jumystarǵa nazar aýdaryp, aldaǵy basymdyqtardy belgilep berdi, – dep jazdy ol.
Prezıdentimiz memleket tarapynan qolǵa alynǵan ár bastama, eń aldymen, halyqtyń ál-aýqatyn arttyrýǵa qyzmet etýi kerektigin basa aıtty. Osyǵan oraı Úkimetke eńbek etýge qolaıly jumys oryndaryn ashý, azamattardyń tabysyndaǵy alshaqtyqty azaıtý jáne olardyń bıznespen aınalysýyna teń múmkindik berý jóninde naqty tapsyrmalar berilgenin aıtty.
Sonymen qatar Memleket basshysy ınflásıany aýyzdyqtaý, ekonomıkany órkendetý, búdjetaralyq qatynastyń jańa júıesin qalyptastyrý jáne memlekettik satyp alýlardyń ashyqtyǵyn qamtamasyz etý mindetterine toqtaldy. Otyrysta turǵyn úımen qamtý, jerdiń bir qolǵa shoǵyrlanýyna jol bermeý, sýbsıdıa berý salasyn retteý sıaqty mańyzdy baǵyttar boıynsha da sóz qozǵaldy. Otandyq avtoónerkásipti damytý, elimizdegi qurylys naryǵyn monopolıasyzdandyrý, shetelge zańsyz shyǵarylǵan qarjyny qaıtarý, keden beketterindegi qordalanǵan túıtkilderdi sheshý jáne taǵy basqa salalar da nazardan tys qalǵan joq, – dedi Senat tóraǵasy.
Sondaı-aq ol búgingi is-sharada Prezıdentimiz jańarý úshin ádil, ashyq ári túsinikti memlekettik saıasat júrgizilýi kerektigin aıryqsha atap ótkenin tilge tıek etti.
- Jyl basyndaǵy qaıǵyly oqıǵalardan keıin bul máselelerdiń ózektiligi arta túskeni sózsiz. Sondyqtan Memleket basshysy olardy sheship qana qoımaı, elimizdi saıası, áleýmettik-ekonomıkalyq jańartý baǵdaryn kún tártibine shyǵardy. Búgingi is-sharada Prezıdentimiz jańarý úshin ádil, ashyq ári túsinikti memlekettik saıasat júrgizilýi kerektigin aıryqsha atap ótti. Bul «Jańa Qazaqstannyń» basty qundylyǵy ekeni anyq. Shyn máninde, el ıgiligine qyzmet etý – bárimiz úshin mańyzdy mindet. Sol sebepti Parlament Senaty Memleket basshysynyń bastamalary men reformalarynyń tabysty iske asyrylýyn zańnamalyq turǵydan sapaly ári ýaqtyly qamtamasyz etý úshin Úkimetpen birlesip, tıisti jumystardy atqara beredi, – dep jazdy Máýlen Áshimbaev.