İskerlik keńes aıasynda «Samuryq-Qazyna» men ARQ arasyndaǵy yntymaqtastyq týraly memorandýmǵa qol qoıyldy
Sharaǵa London qor bırjasynyń jáne Qazaqstan Respýblıkasy Syrtqy ister mınıstrliginiń basshylyǵy, qazaqstandyq jáne brıtanıalyq iskerler qaýymdastyǵynyń ókilderi qatysty, dep habarlaıdy Almaty-akshamy.kz
«Samuryq-Qazyna» AQ basqarma Tóraǵasy Almasadam Sátqalıev London qor bırjasynyń kapıtal naryqtary jónindegi tobynyń jetekshisi Múrreı Roospen kezdesip, «Qazatomónerkásip» kompanıasyn jekeshelendirý mysalynda Qor men bırjanyń tıimdi yntymaqtastyǵyn tilge tıek etti. «Qazatomónerkásip» AQ aksıalaryn jarıaly túrde ornalastyrý tuńǵysh ret Nur-Sultan men Londondaǵy alańdarda 2018 jyly júrgizilgen. Al 2019 jáne 2020 jyldary qosymsha aksıalar ornalastyryldy.
Nátıjesinde, «QazAtomÓnerkásiptiń» 25% úlesi jeke ınvestorlardyń qolyna ótip, kompanıa 785 mln dollar kóleminde ınvestısıa tartty. London qor bırjasynyń kapıtal naryqtary jónindegi tobynyń jetekshisi Múrreı Roos «Samuryq-Qazyna» Qorymen seriktestiktiń áleýeti zor ekenin erekshe atap ótti. Sonymen qatar Londonda Qazaqstan – Brıtanıa iskerlik keńesiniń otyrysy ótti. Bul qurylymǵa «Samuryq-Qazyna» Qorynyń basshysy Almasadam Sátqalıev pen Ulybrıtanıanyń Qazaqstandaǵy Saýda elshisi baronesa Emma Nıkolson teń tóraǵalyq etedi. Sharaǵa qazaqstandyq jáne brıtanıalyq iskerlik qaýymdastyqtyń ókilderi jáne halyqaralyq ınvestorlar qatysty.
Birikken Ulttar Uıymynyń klımattyń ózgerýine arnalǵan COP26 konferensıasy qarsańynda otyrysta qaralǵan basty taqyryptardyń biri – turaqty damý men 2060 jylǵa deıin kómirtek beıtaraptyǵyna qol jetkizý máselesi. İskerlik keńes aıasynda «Samuryq-Qazyna» men ARQ arasyndaǵy yntymaqtastyq týraly memorandýmǵa qol qoıyldy. ARQ basshysy Djýlıana MakIntaıer málimdegenindeı, brıtanıalyq ınvestorlar Qazaqstan aýmaǵynda kómir óndirý qaldyqtaryn qaıta óńdeıtin kásiporyn qurylysyn júrgizýge qyzyǵýshylyq tanytyp otyr.