Áleýmettik jelide «Kindikke maı jaǵyp, kóp aýrýdy emdeýge bolady» degen jalǵan aqparat taraýda, dep habarlaıdy almaty-akshamy.kz stopfake.kz silteme jasap.
Kindikke ártúrli maı jaǵyp, býyn aýrýlaryn, sańyraýqulaqtardy emdeýge, kórý qabiletin túzetýge, teri men shashtyń sapasyn jaqsartýǵa bolady eken. Belgisiz dárigerdiń atynan osyndaı erekshe keńes taraýda. Buǵan ǵylymı negiz bar ma? Anyqtaıyq.
Kindik – bul ár adamnyń denesindegi alǵashqy tyrtyq. Biz áli qursaqta bolǵan kezde ol denemiz plasentaǵa kindik arqyly qosylǵan jerde qalady. Kindiktiń ózinde kóktamyr jáne eki kindik arterıasy bolady. Birinshisi uryqqa ottegimen baıytylǵan qan jetkizedi. Ekinshisi arqyly balanyń qaldyqtary men kómirqyshqyl gazy anasyna qaıtarylady.
Týǵannan keıin kindik qaldyqtary keýip, túsip qalady. Kindiktiń kóktamyry baýyrdyń dóńgelek baılamyn quraıdy.
Jalpy, kindik eresek adamnyń anatomıasy úshin mańyzdy emes. Ol estetıkalyq fýnksıany atqaryp, dárigerlerge ishti kózben sektorlarǵa bólý úshin qajet. Sondaı-aq laparoskopıalyq operasıalar kezinde kindik kerek organdarǵa tez jáne tikeleı qol jetkizý úshin tesik retinde qoldanylýy múmkin.
Halyqtyq medısınada kindikke efır maılaryn jaǵý arqyly teriniń sapasyn jaqsartýǵa, teri aýrýlaryn emdeýge, shashtyń túsýin toqtatýǵa jáne kórý qabiletin túzetýge bolady degen pikir qalyptasqan. Keıbir derekkózderd kindikke jaǵylǵan nıma maıy kontraseptıv qyzmetin atqarady delingen.
Biraq ártúrli derekkózderde ártúrli maılardyń birdeı qasıetteri sıpattalǵan. Mysaly, Qaznette qysha maıy bas aýrýyn emdeıdi dep jazylsa, reseılik saıttarda ony kindikke jaqsa, qurǵaq teri jaqsarady delingen.
Jalpy, kindikke maı jaqsa, onyń qandaı da bir kómegi bolatynyna dálel joq. Bul taqyryp boıynsha zertteýler júrgizilmegen, kindik kórý organdarymen, býyndarmen baılanysty emes, sonymen qatar sańyraýqulaq ınfeksıalaryna da áser ete almaıdy. Sondaı-aq kontrasepsıa retinde efır maıyna senim atpaǵan jón. Bul ádis te, kóptegen basqa «halyqtyq» ádister sıaqty, ǵylymı turǵydan rastalmaǵan.
Qurǵaq erin, shash jáne terige keletin bolsaq, dermatologpen keńeskennen keıin maılardy tikeleı sol jerlerge jaqqan áldeqaıda paıdaly.
Sondaı-aq efır maılaryn terige jaqqan kezde alergıalyq reaksıalar bolýy yqtımal ekenin umytpańyz. Onyń belgileri – teridegi kópirshikter, bórtpeler, jaryqtar men qabyrshaqtar, teriniń maı jaqqan bóliginde qyzý men shanshýdyń sezilýi.
Demek, efır maılaryn kindikke jaǵý maǵynasyz. Mundaı em túriniń qandaı da bir aýrýdan jazatynyna eshqandaı dálel joq. Kindik – bul adam aǵzasynyń músheler júıesimen baılanysty emes jáne kórý qabiletine, býyn densaýlyǵyna, fertıldilikke jáne basqa kórsetkishterge áser etpeıtin tyrtyq.