Almatyda omyrtqanyń stenozy bar naýqastardy hırýrgıalyq emdeýdiń jańa ádisi engizildi
Almatydaǵy №7 qalalyq klınıkalyq aýrýhananyń dárigerleri bel omyrtqasynyń stenozyna shaldyqqan naýqastardy hırýrgıalyq emdeýdiń jańa ádistemesin ıgerdi. Kelesi kúni naýqastardy aıaǵyna turǵyzady, dep habarlaıdy almaty-akshamy.kz
Dárigerler mundaı operasıalardy mindetti áleýmettik medısınalyq saqtandyrý esebinen biregeı ádispen jasaıdy. Mundaı operasıanyń artyqshylyǵy týraly №7 qalalyq klınıkalyq aýrýhanadaǵy №1 neırohırýrgıalyq bólimsheniń meńgerýshisi Baqyt Aǵlaqov aıtyp berdi.
Aıta keterlik derek, bul ádis Qazaqstannyń sanaýly ǵana aýrýhanalarynda qoldanylady, bul ony biregeı etedi. Al Almatyda ony jetinshi aýrýhananyń neırohırýrgteri júzege asyrýǵa kiristi. Eń alǵashqy ota mindetti medısınalyq saqtandyrý aıasynda 75 jastaǵy qarıaǵa jasaldy.
Aqsaqaldyń ýzaq ýaqyt boıy bel aýmaǵyndaǵy aýrý sezimine jáne aýrý seziminiń az fızıkalyq belsendilik kezinde kúsheıetinine shaǵymdary bolǵan . Aqsaqalǵa bel omyrtqasynyń degeneratıvti-dıstrofıalyq ózgeristeri jáne stenoz degen dıagnoz qoıylǵan. Al buryn qabyldaǵan emi múldem kómektespedi.
Dáriger atap ótkendeı, ádette omyrtqanyń stenozy bar naýqastar aýrýhanaǵa óte nashar kúıde túsedi, tipti júrý qıynǵa soǵady.
«Ol 100-200 metrden artyq júre almady, sodan keıin aıaǵynyń uıýy men aýyrýy kúsheıip, aıaǵynyń álsizdigi men ári qaraı qozǵala almaýyna ulasty. Aıaqtaryndaǵy uıyp ketýdi joıý úshin oǵan belgili bir ýaqyt otyrý kerek boldy. Bul aýrý ony sońǵy 5 jylda qınady», - deıdi neırohırýrg Aǵlaqov.
Sondyqtan dárigerler sary baılamdy mıkrohırýrgıalyq jolmen alyp tastaý úshin birinshi az ınvazıvti operasıa jasaýdy uıǵardy.
«Mıkroskoptyń astynda dıametri 12 mm bolatyn tútik arqyly qajetti tilik jasalady. Al kesýdiń ózi 1,5 sm-den aspaıdy. Bul ádistiń artyqshylyqtarynyń biri. Tútiksheli tásilder arqyly az ınvazıvti operasıalar bel omyrtqasynyń stenozyn emdeýde qoldanylatyn tıimdi ádis bolyp tabylady», - deıdi dáriger.
Jańa tehnologıanyń artyqshylyqtaryna mynalar jatady:
- fasettik býyndar men arqa bulshyqetterin saqtaı otyryp, júıke qurylymdaryn dálme- dál alyp tastaý múmkindigi. Bul pasıentterge bel omyrtqasyndaǵy bolashaq turaqsyzdyqty boldyrmaýǵa kómektesedi;
- jedel hırýrgıalyq operasıaǵa qol jetkizý, óıtkeni ol baılamdardy az kesýdi qajet etedi;
- naýqastyń erte saýyǵýy, operasıadan keıingi az aýyrsyný jáne operasıadan keıingi aýyrsynýdy basatyn dárilerdi az qoldaný.
«Naýqas narkozdan oıanǵannan keıin aýyrsyný men uıýdyń joqtyǵyn jáne jatqan qalpynda belsendi qozǵalys aýqymynyń artýyn atap ótti. Jasy úlken adamǵa qalpyna kelý úshin kóp ýaqyt qajet sıaqty bolyp kórinedi. Biraq aǵamyz kelesi kúni óz betinshe júre bastady», - dep dáriger Aǵlaqov otanyń nátıjesimen bólisti.
№7 qalalyq klınıkalyq aýrýhananyń neırohırýrgıalyq qyzmeti búgingi tańda eń ozyq jáne qarqyndy damyp kele jatqan salalardyń biri bolyp tabylady. Joǵary tehnologıalyq, jańa ádister men zamanaýı jabdyqtardy qoldaný kúrdeli neırohırýrgıalyq aýrýlardy anyqtaý men emdeýde joǵary nátıjelerge qol jetkizýge múmkindik beredi.