Aýa raıynyń qolaısyzdyǵyna qaramastan, qalamyzdyń kóziqaraqty oqyrmandary «Almaty pochtamtyn» betke alyp, súıikti basylymdarymen qaýyshýǵa asyqty. Bul kúni «halyqtyń shyraǵy, kózi men qulaǵy» atanǵan barlyq merzimdi basylym ókilderi «Qazposhta» ǵımaratyna jınalyp, dástúrli «Jazylýshylar kúni–2023» is-sharasyna qatysty.
«Jazylýshylar kúni» merzimdi baspasóz quraldarynyń ekinshi merekesi ispetti. Ánsheıinde qym-qýyt tirshilikten qoldary bosaı qoımaıtyn merzimdi baspasóz ókilderiniń de jelpinip, bir serpiletin kúni. Baspasózdiń búgingi jáı-kúıi qozǵalyp, keleshegi sóz bolady. Eń bastysy, oqyrmanymen betpe-bet kezdesken baspasóz ókilderi úshin ashyq alańǵa aınaldy. Jalpy, dástúrge aınalǵan «Jazylýshylar kúni» bul gazet pen oqyrman arasyn baılanystyryp turǵan altyn kópir. Osynaý bir ǵana kúnniń keıde tutas bir basylymnyń taǵdyryn sheshken de kezderi bolǵan. Dál osy kúni qala turǵyndary ózderi qalaǵan basylymǵa tańdap júrip jazylady.
«Jazylýshylar kúniniń» taǵy bir ereksheligi – árbir basylymnyń oqyrmandaryna jasalatyn jeńildikteri bar. Mundaı jeńildikter jyl boıy emes, dál osy kúni ǵana jasalady. Sonymen qatar, oqyrmandardyń gazetke jazylǵan túbirtekterin utysqa qosyp, baǵaly syılyqtardy utyp alýǵa da múmkindigi bar. Osyndaı erekshelikke toly «Jazylýshylar kúni» bıylǵy jyly erekshe ekpinmen ótti. Álemdik indetke baılanysty toqtap qalǵan úrdis qaıtadan jandandy. Jazylýshylar zaly oqyrmandarǵa toldy.
Alǵashqy sóz kezegin «Qazposhta» aksıonerlik qoǵamy «Almaty pochtamty» Almaty fılıaly dırektorynyń bıznes jónindegi orynbasary Temirhan Musaev aldy.
– Osy mekemede búgin barshamyz jınalyp, basymyzdyń qosylǵanyna qýanyp turmyn. Álemdik indetke baılanysty 2019 jyldan bastap «Jazylýshylar kúni» toqtap qalǵan edi. Byltyr osy merekeni qaıta jańǵyrtyp, qolǵa alý úshin «Dóńgelek ústel» ótkizgenbiz. Sol basqosýda bul úrdisti jańǵyrtý máselesi kún tártibinde qaraldy. Nátıjesinde búgin sizdermen qaıta qaýyshyp otyrmyz. Bizdiń mekemeniń basty maqsaty – merzimdi baspasózdiń jandanýy úshin úgit-nasıhat jumystaryn júrgizý. Sizderdiń eńbekterińizdi, ónimderińizdi oqyrmanǵa jetkizý. Árıne, qazirgi jahandaný zamanynda sıfrlandyrý beleń alǵanymen, dástúrli baspasózdiń, gazet pen jýrnaldyń orny erekshe ekeni belgili. Sondyqtan budan bylaı «Jazylýshylar kúnin» jylyna eki márte ótkizgeli otyrmyz, – dedi Temirhan Kenjalyuly.
Kelesi sóz kezegin alǵan «Poshtalyq servıs» fılıalynyń dırektory Nurjan Jabaev «Jazylýshylar kúniniń» erekshelikterimen qatar, paıdaly tustarynyń da kóp ekenine toqtaldy. Oqyrman úshin de, basylym úshin de nátıjeli úrdis ekenin aıtyp, tabys tiledi.
Sonymen qatar, bul kúni baspasóz ókilderi de osynaý is-sharaǵa uıytqy bolyp otyrǵan «Almaty pochtamtyna» rızashylyqtaryn bildirdi.
«Egemen Qazaqstan» gazetinen Aıgúl Turysbekova, «Almaty aqshamy» gazetiniń jaýapty hatshysy Serik Jumabaev sóz alyp, ujymnyń alǵysyn jetkizdi.
«Jazylýshylar kúnine» «Egemen Qazaqstan», Kazahstanskaıa pravda», «Qazaq ádebıeti», «Almaty aqshamy», «Vechernıı Almaty», «Zań», «Túrkistan», «Móldir bulaq», «Balalar álemi», basqa da kóptegen basylym ókilderi qatysyp, óz ónimderin usyndy.
Tús qaıta «Jazylýshylar kúni» aıasynda basylymdarǵa jazylǵan oqyrmandar utys oıyndaryna qatysyp, Altynaı Sadybekova júldege ıe boldy.