Ettiń quny endi óspeıdi. Qazirdiń ózinde baǵa turaqty ári jaqyn arada qymbattaýy ekitalaı. Alańdaǵan jurtqa aýyl sharýashylyǵy mınıstri basý aıtty, - dep habarlaıdy aqshamnews.kz tilshisi "KTK" telearnasyna silteme jasap.
Aıdarbek Saparovtyń aıtýynsha, buǵan deıin et baǵasynyń qymbattaýyna sheteldik suranystyń artýy sebep bolǵan. Qazir bul úrdis toqtap, jaǵdaı turaqtalypty. Dál osyndaı sebeppen byltyr kartop ta qymbattaǵan. Bıyl kartop ónimi 3 mıllıon tonnaǵa kóbeıip, kókónis, bıdaı jáne baqsha daqyldary da mol jınaldy deıdi aýyl sharýashylyǵy mınıstri.
Elde azyq-túlik qory jetkilikti. Endi óńir ákimdikteri turaqtandyrý qoryn der kezinde tolyqtyryp, qys pen kóktemde tapshylyqty boldyrmaýǵa tıis. Bul bazar men dúkenderdegi baǵany ustap turýǵa múmkindik beredi dep otyr mınıstr.
"Byltyr baǵa kóterilgende, ózderińiz bilesizder, suranys shet memleketterden bolyp, baǵa kóterilip ketti. Shynynda bolmaǵan eksport, taǵy da qaıtalap aıtaıyn, 600 myńnan artyq eskport boldy. Sondyqtan biz ishki naryqty jaba bastadyq. Al endi sony bile tura, biz bıyl kartop salatyn jerdi kóbeıtip, bıyl qosymsha 2 mln 900 myń tonna kartop alyp otyrmyz", - dedi Aýyl sharýashylyǵy mınıstri Aıdarbek Saparov.