2022 jylǵy qańtar-mamyr aralyǵynda 28,75 mln tonna munaı eksporttalǵan.
2022 jyldyń qańtar-mamyr aılarynda Qazaqstan 28,75 mln tonna munaı eksporttaǵan. Onyń 27,814 mln tonnasy nemese 97%-y Reseıdiń teńiz porttary arqyly syrtqa shyǵarylǵan, dep habarlaıdy Almaty-akshamy.kz QazAqparatqa silteme jasap.
Bul týraly QR Energetıka mınıstrliginiń baspasóz qyzmeti redaksıanyń resmı saýalyna joldaǵan jaýabynda aıtty.
«Munaı men gazdyń analıtıkalyq ortalyǵy» AQ-nyń deregi boıynsha 2021 jyly Kaspıı qubyr konsorsıýmy arqyly 53,1 mln tonna Qazaqstan munaıy eksporttalǵan. Al 2022 jylǵy qańtar-mamyr aralyǵynda KQK arqyly 23,76 mln tonna Qazaqstan munaıy eksporttaldy», - dep jazylǵan jaýapta.
Vedomstvo bergen derekke súıensek, jyldyń alǵashqy 5 aıynda Qazaqstan Kaspıı qubyr konsorsıýmynan basqa reseılik teńiz porttary 4 mln tonnadan astam munaı eksporttaǵan.
«Munaı men gazdyń analıtıkalyq ortalyǵy» AQ-nyń málimeti boıynsha 2022 jylǵy qańtar-mamyr aralyǵynda 28,75 mln tonna munaı eksporttaldy. Onyń ishinde 27,814 mln tonna munaı (eksportqa shyǵarylǵan munaıdyń shamamen 97%-y) Reseıdiń teńiz porttary arqyly syrtqa jóneltildi», - dep jazady mınıstrlik mamandary.
Sondaı-aq, mınıstrlik ókilderi Qazaqstannyń eksporttalatyn munaı baǵasyn kóterýge nıetti ekeni týraly taraǵan málimetke pikir bildirdi.
«Álemdik saýda naryqtarynda munaı baǵasyn naryq belgileıdi jáne ol Plats, Argýs, Refınıtıv sıaqty táýelsiz halyqaralyq agenttikteri belgilegen mejeniń negizinde qalyptasady», - delingen mınıstrliktiń jaýabynda.
Buǵan deıin Kaspıı qubyr konsorsıýmynyń jumysyn toqtatý týraly sot sheshimi aıyppulǵa almastyrylǵany habarlanǵan bolatyn.