Pavlodardyń irgesindegi qyzǵylt kóldi tuz óndirýshiler keptirip jiberdi degen sóz beker.
Ekologıa jáne tabıǵı resýrstar mınıstri bastaǵan arnaıy komısıa Korákov kóline bardy, dep habarlaıdy Almaty-akshamy.kz Qazaqstan.tv saıtyna silteme jasap.
Buryn bul kól qyzǵylt túske boıalyp turatyn. Qazir sýy tartylyp, tuzy betine shyǵyp jatyr. Biraq budan esh qater joq deıdi mamandar.
«Bizdiń paıymdaýymyzsha kóldiń sýy azaıǵandyqtan túsi de ózgerip otyr. Budan ekologıaǵa esh qaýip joq. Sýy tómen túsken soń tuzy appaq bolyp jatyr. Bul kóldi bilemiz. Túsi ózgerip otyrady», - deıdi QR ekologıalyq aýdıtorlar palatasynyń múshesi Ahan Ómirbek.
Raýshan Qusaıynqyzy 60 jyldan beri kól jaǵasyndaǵy aýylda turady. Tuz alý úshin bul jaqqa bógde adamdar kelgen emes deıdi. Iaǵnı sý aıdynyna turǵyndardyń zıany tımedi dep esepteıdi.
«Úsh jyldan beri qys bolǵan joq. Qar joq. Jańbyr joq. Sondyqtan osyndaı. Bizdiń kezimizde osyndaı bolǵan tuz», - deıdi Korákovka aýylynyń turǵyny Raýshan Qusaıynqyzy.
Bul ǵana emes, Pavlodar jáne Ýspenka aýdany aýmaǵyndaǵy kólderdiń de sortańy shyǵyp jatyr. Sebebi, mamyr aıynan beri aımaqta jaýyn joq, kún ystyq. Sondyqtan Ekologıa mınıstrligi kól sýynyń tartylyp ketýiniń basqa sebebin izdemeımiz deıdi.
«Mınıstrlik tarapynan bul kóldi qorǵaýǵa eshqandaı qarjy qarastyrylmaǵan. Artemıı qurty bul jerde joq. Sondyqtan janýarlar álemi úshin de, ekologıalyq turǵydan da esh qateri bolmaıdy», - deıdi QR Ekologıa jáne tabıǵı resýrstar mınıstrligi ekologıalyq retteý komıteti tóraǵasynyń orynbasary Ermek Omarov.
Úsh jyl buryn Astananyń irgesindegi Kóbeıtuz kólinde dál osyndaı jaǵdaı bolǵan. Bir jyl ishinde kól tutas qurǵap, tamtyǵy da qalmady. Al, Korákovka kóli jańbyr sýymen nemese qar qalyń tússe qaıta qalpyna kelýi tıis deıdi osy aýyldyń turǵyndary.