Sońǵy kezderi dárigerlerdi urý ádetke aınalyp barady
Áleýmettik jelide dárigerdi urǵan vıdeolar kóbeıip barady. Kúni keshe Talǵarda ashýǵa boı bergen azamat ákesiniń ólimine aq halatty jandy kinálap, uryp qulatty. Onymen qoımaı, ákesiniń múrdesin alyp ketti. Artynsha, quqyq qorǵaý organdary áreket etip, ashýǵa berilgen azamattyń jaýapqa tartylatyny týraly aıtty.
Al búgin Shymkent qalasyndaǵy aýrýhanalardyń birinde taǵy da dárigerdi soqqyǵa jyqqan vıdeo tarady. Bul joly dárigerler jınalyp, ashýǵa berilgen azamatty ustap sabyrǵa shaqyrdy. Ázirge mán-jaı belgisiz.
Talaı jandy ólimnen arashalap qalýǵa sep bolyp júrgen osy sala mamandaryna qatysty aıtylatyn syn da kóp. Desek te, dáriger de adam balasy. Olar kúni-túni jumys istep, mamandyǵyna daq túsirmeýge tyrysyp baǵýda. Dúnıeni dúr silkintken pandemıa kezinde dárigerdiń bir jyly sózine zar bolyp edik. Endi mine, sol jandarǵa qol kóterýge baryp jatyrmyz. Nege?
Esterińizde bolsa, osy jyldyń 28 sáýirinde Túrkistan oblysynda jedel járdem qyzmetkerin soqqyǵa jyqqany týraly aqparat taraǵan edi. Polısıa málimetinshe, tártip saqshylary naýqas adamnyń shaqyrtýy boıynsha jolda ketip bara jatqan jedel járdem kóligine kópirde jeńil kólik ıesiniń jol bermegenin anyqtaǵan. Sonyń kesirinen júrgizýshiler arasynda janjal týyndap, jedel járdem qyzmetkeri dene jaraqatyn alǵan bolatyn.