Endi 3580 call-ortalyǵynyń nómerin terip, úlken shahardyń tájirıbeli klınıkalyq psıhologtarynan keńes alýǵa bolady.
Almatyda psıhologtiń kómegin alý úshin 2015 jyly alǵash ret 1303 senim telefony iske qosylǵan. Alǵashqy jyly oǵan 236 adam habarlasqan bolsa, ótken jyly 6 myńǵa jýyq qala turǵyny habarlasqan. Bul týraly Almaty qalasynyń psıhıkalyq densaýlyq ortalyǵynyń dırektory Sapar Rahmensheev aıtty, dep habarlaıdy Almaty-akshamy.kz QazAqparatqa silteme jasap.
- Senim telefonyna bir táýlikte 20, 30, keıde 40-qa jýyq turǵyn qońyraý shalady. Olardyń jas erekshelikteri ártúrli. Psıhıatrıalyq, narkologıalyq qyzmetke muqtaj turǵyndar psıhologtarǵa aǵynan aqtarylyp, kókeıindegi máselesin tarqatyp, qajetti aqparatty alady. Senim telefonynda kásibı, tájirıbeli klınıkalyq psıhologtar elimizdiń túkpir-túkpirindegi halyqqa qyzmet kórsetip jatyr. Bizdiń maqsatymyz da osy. Psıhologıalyq kómek tegin jáne ár adamnyń syry qupıa saqtalady, - deıdi ortalyq basshysy Sapar Rahmensheev.
Onyń málimetinshe, ótken jyly 1303 senim telefonyna habarlasqandardyń basym bóligi - áleýmettik, turmystyq túıitkilder, otbasylyq kıkiljiń, erli-zaıyptylar, ene men kelin arasyndaǵy daý-damaıdy sheshýdiń amalyn suraǵan, kúızeliske túsken jandar. Budan bólek, balalary baǵýdan bas tartqan qarttar, múmkindigi shekteýli jandar, qumar oıynǵa táýeldi jandar, onlaın nesıe alyp, qaryzǵa batqandar da bar. Maskúnemdik, esirtkige táýeldi turǵyndar da emdelýdiń jolyn izdep, senim telefonyna habarlasqan.
«Bıyl qańtar aıynan bastap Almaty qalasynyń psıhıkalyq densaýlyq ortalyǵynyń senim telefony 3580 call-ortalyǵyna qosyldy. Endi 3580 call-ortalyǵynyń nómerin terip, úlken shahardyń tájirıbeli klınıkalyq psıhologtarynan keńes alýǵa bolady. Mundaı call-ortalyqtar Almaty, Taraz jáne Semeı qalalarynda jumysyn bastady», - dedi Almaty qalasynyń psıhıkalyq densaýlyq ortalyǵynyń dırektory Sapar Rahmensheev.