BUU azaptaýdyń aldyn alý jónindegi kishi komıtetiniń delegasıasy Qazaqstanǵa sapar jasady
Birikken ulttyq uıymy ókilderinen qurylǵan arnaıy delegasıa Qazaqstannyń túrmeleri men ýaqytsha ustaý ızolátoryndaǵy jaǵdaıdy baqylady. Bul týraly Syrtqy ister mınıstrliginde ótken brıfıń barysynda belgili boldy, dep habarlaıdy Almaty-akshamy.kz QazAqparatqa silteme jasap.
«Bıyl 26 naýryz ben 1 sáýir aralyǵynda BUU azaptaýdyń aldyn alý jónindegi kishi komıtetiniń delegasıasy Qazaqstanǵa sapar jasady. Onyń barysynda delegasıa músheleri Adam quqyqtary jónindegi ýákilmen, QR Konstıtýsıalyq sotynyń tóraǵasymen, memlekettik organdardyń ókilderimen, sondaı-aq azaptaýǵa qarsy ulttyq aldyn alý tetiginiń múshelerimen, azamattyq qoǵam jáne BUU qurylymdary ókilderimen kezdesti. Delegasıa ókilderi túrmelerde, tergeý jáne ýaqytsha ustaý ızolátorlarynda, sondaı-aq polısıa bólimsheleri men qamaýda ustaý oryndarda bolyp, jaǵdaıdy baqylady», - dedi SİM resmı ókili Aıbek Smadıarov.
Onyń málimdeýinshe, BUU azaptaýdyń aldyn alý jónindegi kishi komıtet delegasıasy elimizge osymen ekinshi ret sapar shegip otyr.
«Bul sapar Memleket basshysynyń saıası reformalaryn júzege asyrý úshin Qazaqstan qabyldaǵan halyqaralyq mindettemeler men usynymdardy júzege asyrýdaǵy ashyqtyǵyn ári beıildiligin rastaǵanyn atap ótken jón. BUU-nyń azaptaýdyń aldyn alý jónindegi kishi komıteti 6 aıdyń ishinde Qazaqstan Úkimetine bas bostandyǵynan aıyrylǵan adamdarǵa qatysty azaptaýdyń jáne basqa da qatygezdik pen jazalaýdyń aldyn alý boıynsha eskertýleri men usynymdaryn usynady», - deıdi ol.