Olardyń mindetine halyqty, obektiler men komýnıkasıalardy qarsylastyń túrli áreketterinen, dıversıalyq nemese terrorlyq aktilerden qorǵaý kiredi.
Aýmaqtyq qorǵanys áskerleri 2017 jylǵy 13 maýsymda qurylǵan bolatyn, dep habarlaıdy Almaty-akshamy.kz QR Qorǵanys mınıstrliginiń baspasóz qyzmetine silteme jasap.
Osy kezeń aralyǵynda áskerler 6 myńnan astam áskerı mindettini oqytyp, daıyndady.
Áskerlerdiń qyzmetine jalpy basshylyqty polkovnık Rızat Qolpashev basqaratyn Bas shtabqa qarasty Aýmaqtyq qorǵanys departamenti júzege asyrady.
Barlyq oblys ortalyqtary men respýblıkalyq mańyzy bar qalalarda beıbit ýaqytta qysqartylǵan quramda ustalatyn jáne tótenshe nemese soǵys jaǵdaıy rejımderin engizý kezinde jergilikti halyq arasynan áskerı mindettilerdi shaqyrý arqyly óristetilýi múmkin aýmaqtyq áskerler quramalary jumys isteıdi.
Bastapqyda bul bólimsheler jergilikti atqarýshy organdardyń komýnaldyq memlekettik mekemeleri retinde jumys istegen bolatyn.
2018 jylǵy sáýirde ákimdikterdiń janyndaǵy aýmaqtyq qorǵanys quramalary Qazaqstan Respýblıkasy Qarýly kúshteri aýmaqtyq áskerleriniń áskerı bólimderi bolyp qaıta quryldy. Sol jylǵy mamyr aıynda ótken jaýyngerlik paradta Memleket basshysy oblystar men respýblıkalyq mańyzy bar qalalardyń ákimderine quramalardyń jaýyngerlik týlaryn tabys etti. Jyldyń sońynda, ıaǵnı jeltoqsan aıynda áskerı qaýipsizdik jáne qorǵanys máseleleri boıynsha ákimniń kómekshisi laýazymy engizildi. Oǵan áskerı qyzmette qajetti tájirıbesi bar Qarýly Kúshterdiń ofıserleri taǵaıyndaldy.
Jergilikti atqarýshy organdar jyl saıyn aýmaqtyq qorǵanys bólimshelerine tirkelgen áskerı mindettilerdiń jıynyn ótkizip turady. Aýmaqtyq áskerler men jergilikti atqarýshy organdar laýazymdy adamdarynyń oqý-jattyǵýlary men biliktiligin arttyrý kýrstaryn ótkizý de bir júıege túsken.
Búginde Aýmaqtyq qorǵanys áskerleri Qarýly Kúshterdiń aýqymy keń oqý-jattyǵýlaryna turaqty túrde qatysyp, ózderiniń mindetterin sátti oryndap júr.