Qarjy monıtorıńi agenttigi ınternet-alaıaqtardyń Batys Qazaqstan oblysynda jastardyń banktik shottaryn zańsyz paıdalanyp, 17 mıllıon teńge kóleminde qarajat jymqyrý deregin tergep jatyr, - dep habarlaıdy aqshamnews.kz tilshisi.
Uıymdastyrýshylar ýaqytsha tabys tabý retinde jastarǵa ekinshi deńgeıli bankterden óz atyna shot ashýdy usynǵan.
Internet-bankıngtiń mobıldi qosymshalary ornatylǵannan keıin shottarǵa kirý qylmyskerlerdiń baqylaýyna ótken.
"Mundaı áreketterge qatysqan tulǵalar – "dropperler" 200-den 350 AQSH dollaryna deıin syıaqy alyp otyrǵan. Olardyń atyna ashylǵan shottar arqyly ınternet-alaıaqtyq qurbandarynan túsken qarajat aýdarylyp otyrǵan. Zańsyz aınalymdaǵy qarajattyń jalpy kólemi 17 mln teńgeden astqan", – delingen habarlamada.
Epızodtardyń birinde banktik kartasy buǵattalǵannan keıin bir dropper zańsyz áreketterge qatysýdan bas tartqan. Qylmystyq toptyń qatysýshylary ony kúshtep ustap, qorqytyp, shotqa qaıta kirýdi qalpyna keltirýdi talap etken.
"Qazir uıymdastyrýshy kúdikti retinde tanylyp, sottyń sanksıasymen qamaýǵa alynǵan. Tergeý jalǵasyp jatyr", – delingen habarlamada.
QR Qylmystyq-prosestik kodeksiniń 201-babyna sáıkes ózge aqparat jarıa etilmeıdi.
Eske salaıyq, 2025 jylǵy 16 qyrkúıekten bastap Qylmystyq kodekske banktik shotqa, tólem quralyna nemese sáıkestendirý quralyna zańsyz qoljetimdilikti berý, taratý ne ıelený úshin jaýapkershilikti belgileıtin 232-1-bap engizildi. Bul bap múlkin tárkileı otyryp, 7 jylǵa deıin bas bostandyǵynan aıyrý jazasyn kózdeıdi.