Shilde aıynyń sońyna deıin mıllıarder Bill & Melinda Gates Foundation qaıyrymdylyq qoryna 20 mıllıard dollar bóledi.
Amerıkalyq mıllıarder Bıll Geıts bar baılyǵyn bolashaqta qaıyrymdylyq qoryna berýdi josparlap otyrǵanyn málim etti, dep habarlaıdy Almaty-akshamy.kz Inbusiness.kz silteme jasap.
«Bolashaqta men qorǵa bar jıǵan-tergenimdi berýdi josparlap otyrmyn. Osylaısha, álemdegi eń baı adamdardyń tiziminen shyǵamyn», – dedi Bıll Geıts.
Ol shilde aıynyń sońyna deıin burynǵy áıeli Melında Geıtspen 2000 jyly birlese qurǵan Bill & Melinda Gates Foundation qaıyrymdylyq qoryna 20 mıllıard dollar aýdaratynyn aıtty. 2026 jylǵa deıin qor shyǵyny 6 mlrd dollardan 9 mlrd dollarǵa deıin ulǵaıtylmaq.
«Men óz resýrstarymdy qoǵamnyń ómirin jaqsartýǵa septigin tıgizetindeı etip qaıtarýǵa mindettimin. Basqa da aýqatty adamdar osyndaı qadamǵa barady dep úmittenemin», – dedi mıllıarder.