Bıe sútinde keremet gamma – lınolen degen qyshqyl bar
Qazaq taǵamtaný akademıasynyń prezıdenti, ǵalym Tóregeldi Sharmanov bıe sútiniń paıdaly qasıeti týraly aıtty dep habarlady Almaty-akshamy.kz turkystan.kz-ke silteme jasap.
Ǵalymnyń aıtýynsha, bıe súti asty jeńil qorytady. Bıe sútindegi maı qanyqpaǵan. Transızomer joq. Ol – qazirgi zamanda adam densaýlyǵyna paıdaly qasıet.
«Jalpy alǵanda, bıe sútiniń qasıeti men quramy osy ýaqytqa deıin óziniń laıyqty baǵasyn almaı keledi. Búginge deıin bıe súti tek qymyz, saýmal retinde paıdalanylýda. Onyń quramy kóptegen sırek kezdesetin hımıalyq elementterge, dárýmenderge, mıneraldyq zattekter men fermentterge baı jáne olardyń aıryqsha fızıologıalyq birigýimen berilgen. Paıdaly elementterdiń osyndaı erekshe birigýi tabıǵatta basqa janýarlardyń sútinde kezdespeıtin, tek bıe sútine ǵana tán qubylys», – dedi Tóregeldi Sharmanov.
Bıe sútinde anyqtalǵan brom uıqysyzdyq, depressıa sekildi júıke júıesi aýrýlaryn keshendi emdeýde qoldanýǵa bolady. Bıe sútiniń taǵy bir ereksheligi, ol qaınatýǵa kelmeıdi, oǵan sterılızasıa, pasterılızasıa jasaýǵa bolmaıdy. Al basqa janýarlardyń sútterin, mysaly, sıyr, eshki, qoı sútterin mindetti túrde qaınatý, pasterılızasıalaý qajet.
«Bıe sútinde keremet gamma – lınolen degen qyshqyl bar. Bul keremet dúnıe, onyń quramy «omega-6-dan» turady. Ol aterosklerozǵa, bakterıalar men vırýstarǵa qarsy áreket etýine baılanysty juqpaly aýrýlardan qorǵaıdy, aǵza úshin ımýnıtetti arttyratyn qorǵanystyq qasıeti basym», – deıdi ǵalym.