Qylmys jasap sottalǵan adamdardy jumyspen qamtý da kún tártibinen túspegen másele. Jazasyn ótep jatqandar da bos otyrmaı, kásippen aınalysýǵa tıis. Túzeý mekemeleriniń aýmaǵynda shaǵyn óndiris oryndaryn ashý, mine, osy túıinin sheshýge aıtarlyqtaı yqpal etýde.
QR İshki ister mınıstrligi Qylmystyq-atqarý júıesi komıtetine qarasty №11 mekemesindegi bos ǵımarattardyń birinde «Azeris» jıhaz sehy ashyldy. Ashylý rásimine Almaty qalasy, Almaty jáne Jetisý oblystary boıynsha Qylmystyq-atqarý júıesi departamentiniń sottalǵandardyń eńbegin uıymdastyrý bóliminiń ınspektory ádilet podpolkovnıgi Erik Raıymqulov, «Atameken» kásipkerler palatasynyń bıznesti qorǵaý jáne ákimshilik tosqaýyldardy tómendetý bóliminiń basshysy Erkebulan Beımbet jáne mekeme bastyǵy ádilet podpolkovnıgi Mıras Tolýbaev qatysty.
– «Azeris» jıhaz jasap shyǵaratyn sehyna jazasyn ótep jatqan 8 jasóspirim jumysqa turdy. Olarǵa eńbekaqy tólenedi. Jazaly jasóspirimder atalǵan sehta zor yntamen jumys isteýde. Bir jaǵynan qazir suranysqa ıe jıhaz jasaý kásibin meńgerse, ekinshi jaǵynan tabys taýyp, sotpen belgilengen shyǵyndaryn óteýge jáne az da bolsa ata-analary men baýyrlaryna qarjylaı kómek berýge múmkindik týǵanyna qýanyshty. Sonymen qatar, eńbekke aralasa júrip sheberlikterin shyńdaıdy. Bostandyqqa shyqqan soń kásibi boıynsha jumysqa ornalasa alady, – deıdi №11 mekemeniń sottalǵandardyń eńbegin uıymdastyrý tobynyń aǵa ınspektory ádilet kapıtany Tolýnaı Nızamova.