Onda sizge qatysty aqparat bar
Qazaqstan pasportyndaǵy chıp qujattyń halyqaralyq standartqa saı ekenin bildiredi. Bul týraly QR Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın aqtóbeliktermen kezdesýinde aıtty, dep habarlaıdy Almaty-akshamy.kz QazAqparatqa silteme jasap.
Áleýmettik jelide Qazaqstan pasportyndaǵy chıpke qatysty árqıly boljam aıtylyp jatyr. Buǵan deıin QR İshki ister mınıstrligi bul másele boıynsha aqparat bergen bolatyn.
Búgin Aqtóbege kelgen QR Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın de chıptiń ornatylý sebebin túsindirdi.
«Pasporttaǵy chıpke qatysty aıtarym, azamattardyń saýattylyǵyn kóterý kerek ekenin kórip otyrmyz. Onyń eshqandaı zıany joq. Zaǵıpa Balıeva Ádilet mınıstri bolǵan kezde ICAO standarttaryna saı bolý úshin jumys atqaryldy. «Halyqaralyq qujatqa chıp engizilýi kerek» degen eskertý 2000 jyldary kelgen. Standartqa saı bolý úshin pasport daıyndaý prosesine ózgeris engizdik. Ol banktiń chıpi sıaqty. Onda sizge qatysty aqparat bar. Aqparatty áýejaıdaǵy, basqa jerde otyrǵan memlekettik qyzmetkerler qaraıdy. «Pasport janymda, qaıda júrgenimizdi baqylap otyrady» dep ýaıymdamańyz. Ol qadaǵalaý úshin jasalǵan nárse emes. Ol pasporttyń halyqaralyq standartqa saı ekenin bildiredi», - dedi Baǵdat Mýsın.
Sonymen birge mınıstr 5G-ge qatysty da túsinik berdi.
«5G aǵzamyzǵa zıan dep te aıtyp jatyr. Aıtarym – dúnıejúzi qarqyndy damyp keledi. Damý úshin biz de tehnologıaǵa beıimdelýimiz kerek. Jańa tehnologıany engizýde sál keshiksek, ekonomıkamyz da, qaýipsizdigimiz de qalady. Sondyqtan beıimdelip, alǵa jyljýymyz qajet. Qaýipsizdik, alaıaqtardan qorǵaý İİM, UQQ sekildi organdardyń quzyretinde», - dedi vedomstvo basshysy.
Aıta keteıik, Qazaqstandyqtar jeke basyna qatysty qate málimetterdi eGov arqyly onlaın túzetý múmkindigine ıe bolady.