Jer silkinisi Qazaqstannan bólek, 4 elde sezildi.
Seısenbi kúni keshke Aýǵanstanda bolǵan jer silkinisinen Pákistannyń Haıber-Pahtýnhva provınsıasynda kem degende 9 adam qaza boldy. Aýǵanstan shyǵysyndaǵy Lagman provınsıasynda taǵy eki adam kóz jumdy, dep habarlaıdy Almaty-akshamy.kz QazAqparatqa silteme jasap.
News gazeti sársenbi kúni Pákistannyń Haıber-Pahtýnhva provınsıasynyń Tabıǵı apattarmen kúres jónindegi basqarmasynyń jańartylǵan málimetine silteme jasap jazýynsha, zilzala saldarynan mert bolǵandar sany qazirgi ýaqytta 9 adamda qurap otyr, taǵy 44-i jaraqattandy.
Seısenbi kúni Dawn basylymy Haıber-Pahtýnhvada turǵyn úılerdiń shatyry men qabyrǵalarynyń qulaýynan eki adam kóz jumyp, altaýy zardap shekkeni týraly málim etken edi. Óz kezeginde Reuters agenttigi Pákistan polısıasyna silteme jasaı otyryp, Svat okrýginde 150-ge jýyq adam jaraqat alǵanyn jazdy. Okrýg aýrýhanalary joǵary deńgeıdegi daıyndyq rejımine aýystyryldy.
Dawn málimetine sáıkes, jerasty dúmpýleri Haıber-Pahtýnhvadan bólek, Pákistannyń ózge óńirlerinde de sezilgen. Sonyń ishinde Peshavar, Lahor, Kvetta, Ravalpındı jáne Islamabad bar.
Onymen qosa, Aýǵanstannyń tabıǵı apattar saldaryn tómendetý jónindegi basqarmasynyń ókili Reuters agenttigine málim etkendeı, Lagman provınsıasynda 2 adam qaza bolǵan.
Eýropa – Jerorta teńizi seısmologıalyq ortalyǵy seısenbi kúni Aýǵanstanda 6,8 magnıtýdasymen jer silkingenin tirkedi. Keıin seısmologtar magnıtýdanyń 6,5 bolǵanyn málim etti. Oshaǵy Aýǵanstannyń Pákistan jáne Tájikstanmen shekarasyna jaqyn jerde, 12 myńnan astam halyq turatyn Ishkashım qalasynan ońtústik-batysqa qaraı 48 km qashyqtyqta ornalasty. Tereńdigi – 185 km. Jerasty dúmpýin, sondaı-aq Qazaqstan, Úndistan, Tájikstan, Ózbekstan elderi sezindi.