Almatyda tuńǵysh ret tabanynyń pishini buzylǵan 16 jasar balaǵa kúrdeli ota jasaldy
Jasóspirim anasynan sırek kezdesetin aqaýmen týǵan. Qos tabanynyń pishini buzylyp, aldyńǵy bóligi ıilip týǵan (at taban) balaǵa Almatydaǵy №2 Qalalyq klınıkalyq balalar aýrýhanasynda biregeı operasıa jasaldy, dep habarlaıdy almaty-akshamy.kz.
Aýrýhana baspasóz qyzmetiniń málimetinshe, asa kúrdeli hırýrgıalyq manıpýlásıany №2 QKBA dárigerleri úsh kúndik halyqaralyq sheberlik klasy sheńberinde reseılik mamandar Maksım Vavılov jáne Tımýr Tornomen birlesip jasady. Sheberlik klasy 13-15 qazan aralyǵynda ótti.
«Aýyr aqaýlarǵa shaldyqqan balalarǵa bilikti hırýrgıalyq kómek kórsetý maqsatynda uıymdastyrylǵan sheberlik klasy «Mıloserdıe» erikti qoǵamy men qalalyq Qoǵamdyq densaýlyq saqtaý basqarmasynyń tikeleı qatysýymen ótip jatyr. Shara sheńberinde barlyǵy aıaq-qoly ishten qatty kemis bolyp týǵan nemese atrofıaǵa júre-bara dýshar bolǵan 7 balaǵa ota jasalmaq. Hırýrgıa salasy damyp jatyr, biz mıkrohırýrgıalyq otanyń zamanaýı ádisterin meńgerip jatyrmyz. Qalpyna keltirýge baǵyttalǵan ortopedıalyq otalar shetelde óte qymbat turady. Al bizde tegin medısınalyq kómek jáne MÁMS paketteri arqyly kórsetiledi», - deıdi aýrýhana dırektory Marat Rabandıarov.
Habarlamaǵa súıensek, 16 jastaǵy pasıenttiń qos tabany ımek tárizdes pishinde. «At tabany» dep atalatyn kavýstyq taban 100 myń halyqtyń ishinde 30 shaqty adamda kezdesýi múmkin. Dertke áıelderden góri erler jaǵy beıim keledi. Ádette tabannyń ıilýine jaýap beretin abdýktorlar maıysady, saldarynan taban da ımek tárizdenip ketedi.
«Tabany shekten tys úlken bolǵandyqtan bala aıaq-kıim kıe almaıtyn. Tabannyń ıiletin jerindegi dıstrofıalyq ózgerister adamdy júrý qabiletinen aıyrady. Sondyqtan mindetti túrde hırýrgıalyq operasıa jasaý qajet. Biz tabannyń tirektik qyzmetin qalpyna keltirýge arnalǵan kúrdeli ota jasadyq. Operasıa kezinde tabandaǵy býyndardyń biri tolyǵymen alyp tastalady. Taban túzetilip, arnaıy vınttermen bekitiledi», - deıdi №2 QKBA travmatologıa bólimshesi meńgerýshisi Erlan Sadyrbalın.
Aıtýynsha, mundaı ota buryn-sońdy Almatyda balalarǵa múlde jasalmaǵan. Pasıent 1,5 - 2 aıǵa deıin aıaǵyndaǵy gıpsti sheshpeıdi. Gıps alynǵannan keıin aýrýhananyń reabılıtasıa bóliminde ońaltýdan ótedi. Ózdiginshe júre bastaǵan soń tirkelgen emhanaǵa baryp ońaltýdyń 3-kezeńi boıynsha emdeledi.
